A-hlu-läk gùi-ah ng’dáng lo ci.

A cun-ah ami ng’htà zah-ung, Jesu cuh, ami ng’lung-ah ng’düí neh, “Nangmí- ung dìm-kiäpnák om hlä,” ci neh ngamí-àm piéin ci.  Ngamí läí cuh m’chà hnguh ci gùi-ah ng’ngài neh cäi-cãt ci gùi. Báwi nawh phih, ngamí-àm piéin lo neh “A i-ah kia hleih nami cäi ng’ä ci-ang? A i nami ng’ngaih-tüh ci-ang?  Kakut goi lah ka khaw goi teng vä. Kei néi. Na zap neh na m’hteih vä. A i-ah kia hleih ci-ung, kei pum käü-mah neh ka kia, nami hnguh-a hlo-ah, m’chà-ung a guh lah a käü-hlá kä om ci.”  Cun-ah piéin nehtah akut goi lah a khaw goi cuh, ngamí-àm k’hmuh gùi ci Ngamí gùi cuh, zèi k’tat neh kä zùm hlot neh ami cügün zah-ung, “Sin-ung ei vai-ah ng’khaw om neh ang?” ci neh ng’si gùi ci. Ngamí nawh phih, ngá ng’saih a pí lah,’ khawi-lù tui pe ci gùi.  Báwi nawh la neh ami mà-ah èi ci.

  Ngamí-àm a piéin cuh, “Moses-ah guknák-ung ni, ce ng’sä gùi-ung lah, ng’äi-nú-ung, kei na bü neh ami guk phùng cuh bé khai ci neh, kei nangmí-awn ka om zah- ung ka piéin cuh, asin gùi ka piéin hlü te-ah kia ci.”

Cun kon-ah m’cäinák ami hmat vai-ah, hngà k’phlàng gùi neh  Ngamí-àm a piéin cuh, “Si chà-ah ng’gu neh om ci. Sin-ah Christù cuh zái-cã nehtah a k’thum k’hngüp-ung si ci gùi-ung-kah ghing lo bà khai.  Ani-ah ng’ming-awn, avan ng’zu bà vai lah, kat phión vai-ah màwng cuh Jerusalem-ung lèng neh k’chàng avan-àm piéin vai.  Nangmí cuh asin gùi avan-ah m’gòng k’bäi-ah nami kia ci.   

Ka pá-ah piéin te, k’chü-khän cuh nami ’khãn-ah ka tüì lo khai. A ’khãn-a kah, m’zung-awn kä nami m’zungnák pha phùng-ung, sin-ah pigò nú-ung om cang vä.