Aghí gui am ng’thûkní m’thêimthàng ah nì lam gui
Aghí gui am ng’thûkní m’thêi ah nì lam gui cuh khmó kthô gui,akhmó hta gui lah ca hnguh hmat ca kchàng gui on kä täng ci. Aghí gui ba kshón ung phihkä yùm tu pha ca aghí gui lah yùm tu pyî ca aghí gui cuh kä täng ba ci.Yùm tu pyi ca aghí gui cuh ami hnguh hmat pyi gui a ng’thumang ba vai bäng hlü ba ci. Avaihlü ah tuhkbäih ktàgü nak akthài gui cuh kä nghlôi hleih akní mcu tu ba kkhit ci gui.Avai hlü ah phùngtàkò ci nak ung ghum-â,na uk chuk ah a hngün ung na ghunkhò ci gui ah hlô ah kya ci. Ami ghin ah lù púm ami mcû mih màn ah kchinglung gui cuh plái hleih ami mcû màn ah kya netah kä nghlôi ba ci.Cun kòn ah (Indulgence)ciah a mòòng gui cuh akní ah kä kshih kchah ci gui.Ami bi màn nglät bäng hmat ci gui. Mü hngün khòngói ktàigü vai,Kyün khngüp gui ung phàyà kyòng hteh vai,kat phyón nak (အာပတ်ဖြေခြင်း)bi vai lah a shi hlá êi vai ci gui ah kya ci. Ak’hlüng ah hmat vai ah Jesu ciah mcû ah phäh ah (Indulgecia) khò khngüp thùmkip gah ci gui cuh kä hmat ci gui.
Cun gui cuh mtùmtäng neh mthêi vai hlü ci. A i phih kä ngthêi kä hngu hmat tu ci gui cuh pâhta kchàng kpyìm gui ah hlô ah mthêi gui neh kä gah ah kya ci. Ca hmat ca a ghí gui cuh ca on mthêi neh gah ah kya ci.Ca kä hmat ca aghí gui cuh mthêi vai ah kà ca kya ci. Avai hlü ah Kkhânmòpí ah om ca kami ning Pá o mthêi bäng hngô khngüp kkô ghà hngô shô hleih phih gah akní ah gah khai mthêi vai kä nghlôi ci.A mi mik gui noh phih akní ah kä hngu neh ami lù kchók phih kä ni lo ba neh ami khngà no phih akní ah kä ngya ba ci gui cuh mthêi kshé ci. Ngami ah hlô gui cuh htahtana ung ktàigü gui düt kyih neh RC ung lo tu hlü te ci gui cuh kä lo tu hlot ci gui. Ngami ah hlô gui ah akya ung khmó yah ung vah läk neh yùm tu vai hlü cutah läk tu vai phih kä kya hnging ci ciah ng’ák shàn ci gui. Ngami gui ah hlô gui ah akya ung a ngshäî ah kä mthêi en neh Jesu ciah pyéin laih laih neh ktàigü gui hlak ung nghlôi tu ba ci.Kä cun ung Jesu,Maria,Joseph kami shih lo vai ung na ghùng na mhtéi gui ä ciah lèng lèng ba neh pyéin hlak gui ung nghlôi tu ba ci.
KChò thùng ung ka akya ung KChò thùng on mtùmtäng neh Budha ung ka akya ung phih Budha ung aktôi hta gui ah ami ktàigü gui on mtùmtäng neh mthêi gui hnging ung ni tu ba khai kya ci. Catholic ktàigü gui ami gah bä bä ung ami yùm tu vai mthêi cuh shi lo ci ca aghí gui am mthêi vai cuh kä nghlôi hnging khai kya ci. Konhkì tûi pe gui neh phàyà ah agup gui tâi pe gui neh aktôi hta gui ah ktàigü hlak gui neh ami gôigê lo ung teng mkêin gui neh ami ngyák hlü gui phih pe tu gui neh khoih hngah gui ah akya ung yèi tu khai gui ah ami thüì yah ung phok gui neh ci cuh ami mlùng khngà ngthong ngjlat khai gui ah kya ciGhì lo ci gui cuh ami kthá kèn lo ci gui ah kya netah ami mlùng kthá ngchüih ba khai ah ahlü-ahngäi ah ngpòng püì gui ung ami yùm tu vai nghlôi tu ba ca kya ci. Aktôi ah pyéin läi ung Kkhânpùghí noh i hlok ah ana mhngî gui cuh mthêin gui gäk gäk neh yèi na gui neh mhtéi gui cuh akní pí kbäih ah kya ci.
