Maih lo ci ca K’Chò Thùng-yò
Maih lo ci ciah K’Chò Thùng-yò gui akdá om ci.Acun ung ka tum kkhôn ah mòòng lam mi teng ba ah akya ung phih maih lo ci ciah tum kkhôn gui om ci.Acun ah tum kkhôn gui ba kshòn ung phih khitkhotkhet ciah tum kkhôn tumat mi teng shüm ko.Shin ah tum kkhôn cuh a ngmìng düt hngô kä ngya tu màn ciah tuhchü khmó kthô gui lah akhmó gui akkhak om lo ci.Khitkhotkhet ah hlô ah kä mi hnguh ngyák tu màn ah kya ca ngmòòng chà,chìngchong,phìphät,kpémhlûi,hngâ pùlòi,kphyùng ciah tum kkhôn gui phih om ci. Acun gui ung kah maih lo ci ca khikhotkhet tum ah thùng-yò mà neh mi teng shüm ko.Khitkhotkhet cuh akhmó htá gui noh ami lûm pyân nak ah tum kkhôn tumat ah kya ci. Cá kchò khmó gui cuh acun ah ami lûm pyân nak on ngvái lo u neh khtìng kbèi kä ngthêi ah tum lo thêi ci gui ah kya ci.Khitkhotkhet cuh ahêi KChò gui ah tum kkhôn gui phih tum thêi vai phäh ah ngyung nak ah kya ci. Khitkhotkhet tum thêi ci noh khtìng kbèi tum thêi ci.
A i ah kya hleih ci ung khitkhotkhet phih kyai phìphät phih kyai aninik khngih cuh a ngtäp ah nghlôi neh nglon khai nggûi neh ngpán khai ah tum ah kya ci.Khitkhotkhet lah khtìng kbèi tum thêi ci noh kshòn neh a kghuih ah a tum ba thêi vai ah pìngpäng om ci. Khitkhotkhet khtìng kbèi ci cuh k’ó kchüih kchàng kchüih noh nglung na neh nggui neh ng’òi neh nglon khai tum ah kya ci.Pìngpäng ci läi cuh kchàng tumat noh k’ó kchüih kut pyang gui on kîtâr,oken ah hlô ah tum ah kya ci. Phìphät cuh pìngpäng ah hlô ah nggûi neh ng’òi khai tum ah kya ci.Cun kòn ah Dâi Thà,Mkàng Thà täng ah chà tu hngá hleih ami tum ah hngakhong on üt neh tum ah pùlòi om ci. Tum thêi ci phih akya ah kèn ci.Khòmdek ah kkhân ah cun ah hlô ah tum ci phih kä om ca kya ci.Cun kòn ah chìngchong phih om neh ùm ung gò nglòi gui on mhlôi neh ami muh ah kphyùng phih om ci. Cun ah KChò gui ah tum kkhôn gui ung kah khitkhotkhet cuh avan ah phäh ah ahoi phih nghlôi tu ba ca kya ci.
A i ah kya hleih ci ung KChò gui cuh om têtê netah khtìng kbèi kä tum kkhôn vai ci ci gui. Yù hlak shih htüm yah bäng ung khtìng kbèi tum vai. Om kshìng khngìm ung kä tum màn yeh ci ah ami hlôi ah kya ci. Acun ah ami hlôi yeh ah phäh ah tum thêi ci maih lo ghepghep ca kya ci.Cun kòn ah ahéi lûm pyân nak gui lah aktùng pì ah KChò khmó hta gui phone on lùmlo u neh ahêi a i phih i ah kä ngngài ba ci gui.Acun ah nglùng ah cá lûm pyân tum kkhôn gui mthêi gui vai cuh kä nghlôi ci.Cun tu láng pâng ah phih a i ah mthêi ba gui ung phih kä gah täng khai ciah nong düt ung tum kkhôn gui cuh maih lo píhtí khai kya ci. Cun ah kä nghlôi ci gui phlän neh mchüt hnging vai ah nì lam gui cuh om täng täng khai.Cun ah nì lam cuh bi hlü neh mchüt hlü ca nì lam on shûi ung gah vai kya ci.Tängpàng ca kchàng tumat cuh acun ah mlùng a om vai hlü ci.Akdá pí noh A B C tän kkhêi neh mthêi thêi ci cuh KChò Thùng,KChò Ca ah ngngài ci gui.
Akcàng pyéin ung KChò gui ah tum kkhôn,ng’äî ng’om kä hmat neh KChò Ca mthêi cuh gaih vai ah kya ci.Mi guk thén lo tu ah ca cuh yânta gôi vah mi lèng tu ah kya ci. KChò gui ah Thùng-yò ci cuh KChò gui ami om lo yah gé ung om lo ca kya ci. Ngtüî om lo nak ah thùng-yò kä hmat netah kchî gui düt a pám vät neh mi guk ah akya ung Kchò ah kya nak ah Thùng-yò cuh kä om khai kya ci. Acun ah kya hleih mi thùng-yò gui ung kah KChò Khmó gui ung tün neh lùm pyàng neh mdáng nak ah mòòng cuh kyòng ca ngthêi nak ung khäng htek khai kä mi bi hlü ah akya ung avan cuh maih khai kya ci. Tukbäih ka guk gui cuh mi hmat nak thêi vai ah ka guk ah kya ci. Cun ah tah ni tu ba hleih tängpàng bilo neh pyéin hnging ci gui ami om lo ung ni tu pí khai kya ci.
Culture
