Jesu ami ngon.
Cun-ah a piéin kon-ah, Jesu cuh A-hlu-läk gùi mah-ah, Kidron k’hmòi-k’chong hei ’kat neh cu zah-ah om ci-ah, ng’vong ’kiòng-ah lut ci gùi. Jesu nawh, A-hlu-läk gùi, a cu zah-ah hnguh gùi htí man ci-ah kia hleih a Báwi k’tûn ci-ah Judas nawh phih, cu zah cuh, hmat tu ci. Cun-ah kia hleih khàw m’tät gùi lah, k’tài-gü ng’vái gùi, pharisee gùi nawh, ami tüih täk-ah k’chàng gùi, Judas nawh khah lo püi gùi hleih mei im ni, mei m’htài ni lah, li ’chìm gùi ’kot u neh lo ci gùi. Jesu nawh phih, a mät ung kia lo khai gùi cuh hmat zop neh lo ci-ah k’chàng gùi-ah hteit nehtah “A u nami sùi ci ang?” ci neh a na ng’si gùi ci. “Nazareth Jesu,”ci neh m’sàng bà u hleih Jesu nawh phih, “Kei néi,” ci neh a piéin. A Báwi k’tûn ci-ah Judas phih, ami ng’lùng-ah ng’düí tu ci. Jesu nawh, kei néi, ci hleih ami hngu lam-ah, äk neh kiu zop ci gùi. Cun-ah kia hleih Jesu nawh, “A u nami sùi ci ang?” ci neh lèng neh ng’si bà gùi hleih, “Nazareth Jesu néi,” ci neh m’sàng bà ci gùi. Jesu nawh phih, “Kei néi ka ci pi ci; kei nami na sùi ci-ah a kia ung sin-ah ka po gùi cuh, hteit u hlä,” ci neh piéin ci. ‘Báwi nawh, a na m’säm-ah k’chàng gùi-ung-kah, a u phih, kä di dam khai,’ a ci te cuh a ng’chüíp vai-ah, a piéin-ah kia ci.
Simon Petru nawh, a ’chìm ng’zúk neh k’tài-gü ng’vái-ah täk-phàn k’chàng-ah, a k’pat hnga-kòi, tuk pe-pit ci. Cun-ah a täk-phàn k’chàng cuh, Malchus-ah kia ci. Jesu nawh phih, “Na ’chìm cäh, ’chìm kíäp ung ghón bà-ä. Ka Pá nawh a na péit-ah bäít cuh kä ka áwk vai ang?” ci neh Petru àm piéin ci.
Cun kon-ah, khàw m’tät gùi nawh, ami khàw m’tät Báwi mah-ah lah, Judeu khawh m’tät gùi nawh, Jesu pha u neh chit u nehtah Anna-ah im-ah, khah püi mà ci gùi. Anna cuh, cu kum ung k’tài-gü ng’vái pí-ah kia ci-ah, Cãiphas-ah a ’kòi-ah kia ci. A cun-ung phih, Anna nawh, Jesu cuh a ng’chit-ah, k’tài-gü ng’vái pí Cãiphas àm a tüih.‘K’Chàng gùi avan-ah phäh-ah, tumat a sih ung bä tu bà khai,’ ci neh Judeu k’chàng gùi àm, a zan piéin te ci cuh asin-ah Cãiphas-ah kia ci.
Simon Petru lah,a hei k’chàng tumat nawh, Jesu cuh, läk tu ci goi. Cun-ah k’chàng tumat cun phih, k’tài-gü a ng’vái pí awn ng’hmat tu ci-ah kia neh Jesu awn a kong ät-ah, im ’kiàwng-ah lut tu ci. Petru läí cuh a k’pùng-ah, m’kot pèi-ah om ghüt ci. Cun-ah kia hleih k’tài-gü awn ng’hmat tu ci-ah k’chàng cun nawh, lut lo bà nehtah m’kot ngäng, ng’là àm piéin neh Petru phih, m’hluh tu ci. Cun kon-ah, m’kot ngäng ng’là nawh, Petru àm, “Nang phih, sin-ah k’chàng-ah a k’chàng gùi-ung-kah, kä na kia tu ci ang?” ci neh ng’si hleih Petru nawh, “Kä kei néi,” ci neh a m’sàng bà. M’Zu ci-ah kia hleih täk-phàn k’chàng gùi lah, khawh m’tät gùi, mei-àwm neh om te ci gùi. Petru phih, ami ng’lùng-ah, mei-àwm tu ci.
K’Tài-gü a ng’vái pí nawh, Jesu cuh a k’chàng gùi lah a m’thei gùi-ah a màwng ng’si ci. Jesu nawh, “Kei nawh, k’chàng gùi avan-ah mà-ah, a ng’dáng-ah ka piéin man ci. Judeu gùi ami ng’bumnák cã-gat gùi lah, khaw im ung ka m’thei lä man ci. A ng’zih ng’kù-ah, a i kä ka piéin man ci. I vai-ah, kei nà ng’si ang? Ka m’thei ng’za tu ci-ah k’chàng gùi vah, na ng’si gùi vai. Ngamí nawh ka piéin gùi cuh hmat ci gùi,” ci neh m’sàng bà ci. A pèi-ah om ci-ah, khawh m’tät nawh, “Nang, k’tài-gü ng’vái, si k’chà-ah nà m’sàng ci mâ?” a ci lah, a ng’bèing ung k’beh ng’hap ci. Jesu nawh, “Ka k’chü èih neh a kia ung a èih-ah màwng na m’gàwng awn piéin-ä. Ka k’chü kä èih mùi ung a i vai-ah nà hup-depnák ci ang?” ci neh a piéin tu bà. Cun kon-ah, Anna nawh phih, Báwi Jesu cuh k’tài-gü ng’vái Cãipha àm a tüih.
Simon Petru, mei a ãwm tu zah ung “Nang cuh, a k’chàng gùi-ung-kah kä na kia tu ci ang?” ci neh a u nawh boh ng’si hleih ani nawh ng’cing mah neh, “Kä kei néi,”ci neh ng’htìm ci. Petrus nawh, a hnga-kòi a tuk-pit ni-zah, k’tài-gü ng’vái-ah täk-phàn k’chàng nawh, “Ani mah-ah ng’vong ’kiàwng-ah, ning hnguh cãn-ah kä kia ci ang?” ci neh ng’si hleih, Petru ng’cing neh ng’htìm bà mä ci. A cun vai àm ài khàwng ci.
