Paolo mânggo ung ka Bä ciah Francis ah ghünlu a mong

Christu kum 1416 ung Italy ghunkho htum lam ah ng’tüi ciah Bä ciah  Francis cu a ni hta k’hmo kä om tu hlot hleih k’taigü nak ung k’tha nak ne Khanpughi yum äp ciah Nu Pa ung ka no ng’tüi om lo ciah kya ci. A nu lah a Pa no ng’tüi lo khai ah a k’hmo hta cu Bä ciah Francis Asisi a ni m’hlüng m’tai nak awn Khanpughi am gänap khai goi ah a ni m’lung a ni phukpit ah kya ci. A cun ah kya hleih a k’hmo ng’tüi om lo tu hleih Francis ci ne a ng’ming a ni hlui ah kya ci. Nga ni no a ni hta cu Boi Yesu Christu ung a yum nak a khänghtek hnging vai ah a ni ah m’thei m’thang ne lam m’shüm ci goi ah kya ci. Francis cu a kho kum 12 be lo hleih a nu lah pa no Yahteih gui ah hngu ah khoku m ät hlok  a om tu vai ah a mi tüih nak awn Yahteih gui ah Khanpuhgi ah mâ ah a mi ng’gun nak gui cu bi hlot ci gui ah kya ci. A ni cu a k’hmo ah kya ne a nu pa k’tu awn Roma mânggo ah hteit ne mânggo k’däm cu a kya ah k’chang gui phih dâ ne ng’phät ne a kya cu a ni ah phäh ah k’pam cai ne hmong cang ciah kya ci. A cun ah kya hleih hlumlei ne a mi k’pam cai nak gui ung ka no piggo hta ung ng’phlon ne dìmkyäp khai ah om khai ah a m’lung phukpit ciah kya ci. Bä ciah Francis Asisi ah om k’ih gui thei bang tu ne Paolo mânggo a k’pung lam ah om ciah ku hta tumat ung ng’phlon ne om ne ta ei ok hloi ne, kyünhlo ne , a kat nak gui ah phäh ah ng’yu ng’yon ba nak awn ng’phep ne om ciah kya ci.

K’chang hei gui cu a ni ah om nak ah hteit ne ng’pong tu u ne ta k’taigü nak lah kyünhloi nak awn k’tha na tu ci gui ah kya ci. Christu kum 1436 ung Francis Asisi ah Yahteih gui ci ne a ng’bum tumat cu om lo ciah kya ci. A cun Paolo mânggo ung om ciah k’chang gui no ngami gui ah ng’shunghei ciah m’lung k’nga lah ng’phep guih ne du nak ung a mi gänap cu m’nai tu u ne ngami gui ah om nak ah hteit u ne a phei ng’et nak gui ung im co ne om tu ci gui ah kya ci. Christu kum 1474 ung ngami gui cu Yahteih ng’htoi tumat ah kya lo ci. A hei kyawng gui phih Italy ghun kho htum lam ah a mi k’hmon ah kya ci. Ngami gui ah a mät ah ng’yak hlü gui nong ne Chritu kum 1483 ung Pyinhtit Shangpughang no htei ne a mi om tu vai ah a chü thäm tu gui cu do ciah kya ci. Francis cu Italy ung ka no kho dok kä ng’lah ein ne hteit ne ta a gok nak ah ih om nak a k’ni ung a mi m’om tu hlü cun phih dam ciah kya ci. A hteh nak lam pum k’taigü ciah kya ci. A ni cu Pyinhtit Nantwin ung k’chang hei gui awn kä täng ein ciah k’chin tumat ah kya ci. A ni cu ei ok k’ni gui ei ok ah ta kyünhloi ne k’taigü yum tu ba ne a kho dok phih a k’ni a phu kyüi ci ah ng’kho kä ng’leh hlü ciah kya ci. A ih nak vai phih k’pe tumat ta düt mang ne ip ciah kya hleih Pyinhtit ghun kho mang  gui no a ni ah m’lung k’nga a ng’shung hei, a ni gui ah phäh ah a kya ah a mi m’nai tu ah kya hleih Pyinhtit ghunkho, Spain ghunkho lah Germany ghunkho gui ung Yahteih kyawng gui a coh vai ah lam a mi pyan peit ah kya ci. Bä ciah Fancis cu a im ah kä hteit ein ba ne Christu kum 1507, April k’cha 2 ung Pyinhtit kho ah shi ciah kya ci.