A-hlu-läk gùi-ah khaw-lek m’si péit gùi ci.
Paschal kä om pha ung Jesu nawh sin-ah khaw m’dek ung-kah, a Pá-ah a ng’plonnák vai a chin lo cuh, hmat ci. M’Dek ’khãn-ah a nong ghüt-ah, a-hlu-läk gùi cuh, m’hni gùi neh a k’càng càng-ah m’hni gùi ci-ah kia ci.
Simon-ah htá, Judas Iscariot-ah m’lung ung Jesu a k’tun vai-ah, khaw-’nget nawh a tók tu gé. Jesu nawh phih, avan kanák vai-ah, a Pá Khãnpùghí nawh a péit lah, a mät cuh, Khãnpùghí ung-kah lo neh Khãnpùghí-ah a hteh lo bà vai cuh, hmat zop neh ei ami einák-ung-kah, ng’düí lo neh a ng’vaih hlúit ci. Hlam zun-bèi mah awn a ’chéi chit ci. Cun kon-ah, khap tumat ung tui lüng neh, a-hlu-läk gùi-ah khaw m’si péit gùi nehtah a ’chéi a chihnák-ah, hlam awn ghuit péit gùi ci.
Simon Petru-ah gok lo hleih Petru nawh, “Nang Báwi, ka khaw na m’si khai nü mä,” ci ci. Jesu nawh, “Ka bi cuh, tuh-chü kä na hmat ci. A k’hngú-ah na hmat lo khai,”ci ci. Petru nawh, “Báwi nawh, kei-ah khaw-tah a i zah ung phih, kä m’si ng’nü khai néi,” ci neh dám hleih Jesu nawh, “Kä ka ning m’si ung nang cuh, kei awn kä ni vun-ät khai,” ci neh piéin ci. Petru nawh phih, “Báwi aw, cun-ah a kia ung ka khaw bäng-ah kä kia neh kakut ni, ka lu-’kè ni mah-ah néi bäí,” ci ci. Jesu nawh, tui ng’si pi ci-ah phäh-ah, a khaw bäng m’si vai hlü ci. Ani a púm-ah théing-èi ci. Htaih láng u ci hleih phih, a m’sah kä théing htaih tu ci. Ani u nawh k’tun lo-khai cuh, hmat neh, “Nangmí ung a m’sah kä théing ci,” a ci-ah kia ci.
Ami khaw a m’si zop kon-ah, a hlui hlùi bà neh ngoh nehtah, “Ka ning bi péit gùi-ah màwng cuh, nami hmat ci ang? M’Thei tu k’tu lah, Báwi-ah kia tu ’càng-a hleih nami na chü ci. A cun-a phih ka kia mä ci. Nami na Báwi, nami na m’thei tu k’tu nawh, nami khaw ka ning m’si péit gùi-a hlo-ah, nangmí phih tumat lah tumat, khaw nami m’si tu kiu vai. Kei nawh nangmí ung ka ci nami hnguh-a hlo-ah, nami bi vai ka ning m’thei gùi ghüt-ah kia ci. Nangmí àm kei nawh a k’càng-ah ka piéin cuh täk-phàn k’chàng cuh, a Báwi a tah kä ng’vái tu bà ci. Tüih phih, tüì ci-a tah kä ng’vái tu bà ci.
