Juda nawh Jesu a zoih.
Cun kon-ah a-hlu-läk gha-leigoi ung-kah Juda Iscãriot ci cuh, k’tài-gü ng’vái gùi-ah hteit neh “Ani nangmi-àm ka ning àp gùi khai. Nangmí nawh a i néi nami na péit kò,” ci hleih ngami nawh ‘ngùi thumkip ning péit vai’ ci neh ng’khän ci gùi. A cun-ung lèng neh ani nawh phih, i-ho cha Jesu a àp vai cuh, ng’mün neh om ci.
K’Có kä súm-ah m’htut èinák a k’htük hngüp a-hlu-läk gùi nawh Jesu k’et u neh “Paschal na èi vai-ah a hoi-zah kami-pian vai na ng’zák hlü ci ang?,” ci u hleih Jesu nawh “Cun ng’mingnák ci-ah k’chàng-ah hteit tu neh saza ng’vái nawh na m’cäi gùi ci. Ka ma lam ng’et lo pi ci. Ka k’chàng gùi-awn, a kong ät-ah na k’piú-ah Paschal kabi khai, ci neh ani àm nami piéin vai,” ci neh m’cäi gùi ci. A-hlu-läk gùi nawh phih Jesu nawh a m’cäi gùi-a hlo-ah piüí neh Paschal èi piàng tham ci gùi.
Mühngün-ah kia lo hleih Báwi cuh, a-hlu-läk gha-leigoi awn a kong ät-ah ng’hngan ci. Ami èi zah ung Jesu nawh “Nangmi àm, a k’càng-ah ka piéin cuh, nangmi-ung-kah tumat nawh kei na zòi lo vai neh pong ci,” ci hleih Ngami cuh, a kia-ah thüi u neh “Báwi aw kei hmán mä?” ci neh ng’si phäh phäh ci gùi. Báwi nawh phih, “Kei awn a kong ät-ah dàwn ung phiom tu ci nawh na zòi lo khai, K’Chàng-ah htá cuh, m’cäinák ung a om-a hlo-ah a hteh vai-ah kia ci. Cun tu pang-ah phih, k’chàng-ah htá zòi khai nawh zái-cãnák a k’däm hnguh khai. Ani cuh, kä mi htánák gé ung ni tu bà pí khai hlü,” ci neh piéin ci. Báwi zòi ci-ah Juda nawh phih, “Báwi aw kei-ah kä kia hnga ng’tüi ci mä?” ci neh ng’si hleih “Na piéin pi ci,” ci neh m’sàng ci.
