Juda nawh Jesu a zoih.
Cun kon-ah a-hlu-läk gha-leigoi ung-kah Juda Iscãriot ci cuh, k’tài-gü ng’vái gùi-ah hteit neh “Ani nangmi-àm ka ning àp gùi khai. Nangmí nawh a i néi nami na péit kò,” ci hleih ngami nawh ‘ngùi thumkip ning péit vai’ ci neh ng’khän ci gùi. A cun-ung lèng neh ani nawh phih, i-ho cha Jesu a àp vai cuh, ng’mün neh om ci.
K’Có kä súm-ah m’htut èinák a k’htük hngüp a-hlu-läk gùi nawh Jesu k’et u neh “Paschal na èi vai-ah a hoi-zah kami-pian vai na ng’zák hlü ci ang?,” ci u hleih Jesu nawh “Cun ng’mingnák ci-ah k’chàng-ah hteit tu neh saza ng’vái nawh na m’cäi gùi ci. Ka ma lam ng’et lo pi ci. Ka k’chàng gùi-awn, a kong ät-ah na k’piú-ah Paschal kabi khai, ci neh ani àm nami piéin vai,” ci neh m’cäi gùi ci. A-hlu-läk gùi nawh phih Jesu nawh a m’cäi gùi-a hlo-ah piüí neh Paschal èi piàng tham ci gùi.
Mühngün-ah kia lo hleih Báwi cuh, a-hlu-läk gha-leigoi awn a kong ät-ah ng’hngan ci. Ami èi zah ung Jesu nawh “Nangmi àm, a k’càng-ah ka piéin cuh, nangmi-ung-kah tumat nawh kei na zòi lo vai neh pong ci,” ci hleih Ngami cuh, a kia-ah thüi u neh “Báwi aw kei hmán mä?” ci neh ng’si phäh phäh ci gùi. Báwi nawh phih, “Kei awn a kong ät-ah dàwn ung phiom tu ci nawh na zòi lo khai, K’Chàng-ah htá cuh, m’cäinák ung a om-a hlo-ah a hteh vai-ah kia ci. Cun tu pang-ah phih, k’chàng-ah htá zòi khai nawh zái-cãnák a k’däm hnguh khai. Ani cuh, kä mi htánák gé ung ni tu bà pí khai hlü,” ci neh piéin ci. Báwi zòi ci-ah Juda nawh phih, “Báwi aw kei-ah kä kia hnga ng’tüi ci mä?” ci neh ng’si hleih “Na piéin pi ci,” ci neh m’sàng ci.
Mü-èi ami èi zah ung Jesu nawh m’htut la neh a bänák m’hlüng m’tai bà nehtah k’bõ neh “Sin cuh, kei-ah käü-ah kia ci. La neh èi vä,” ci-ah piéin neh a-hlu-läk gùi àm pe gùi ci. M’Si bäít la neh ngami-àm pe gùi neh a piéin cuh, “Nami om ci phung nawh aw- vä. A i-ah kia hleih ci ung sin cuh, k’chàng a k’dá-ah phäh-ah kat k’phión khai-ah ng’khännák-ah kei-ah si néi. Nangmí-àm ka piéin cuh, ka Pá-ah khàw-ah, nangmi awn a kong ät-ah, ca-pit ng’sun theih-ung-kah, ka áwk güt chüt-tah tuh ’bäih lèng neh kei kä ka awk bà khai.”
Cun kon-ah, ng’äi-nú m’cu u nehtah Htanlun khaw m’htung-ah hteit ci gùi. Cun-zah ung Jesu nawh “Nangmi nami om ci phung tuh-mü nà mi na zùmnák maih khai. A i-ah kia hleih ci ung Htò k’säm ka that khai. Htò ng’bum gùi cuh, ng’pài zop khai gùi, ci neh m’cäinák-ung om ci. Cun tu pang-ah phih, kei ka ghin lo bà kon-ah, Galilee khaw-ah kana hteit mà khai,” ci neh piéin hleih, Petru nawh “Om ci phung-ah zùmnák a maih-ung phih kei läí cuh, kä zùm neh kä ka kia khai,” ci ci. Jesu nawh “Nang-àm a k’càng-ah ka piéin cuh, tuh-mü ài kä khàwng pha hleih nang nawh kei k’thùm vei nà na ma püi khai,” ci neh piéin-hleih Petru nawh “Nang awn a kong-ät-ah ka sih tu vai-ah a kia ung phih, nang cuh, kä ka ning ma bà khai,” ci neh piéin ci. A-hlu-läk gùi van nawh phih a cun bäng bäng-ah piéin tu ci gùi.
Cun zah ung Jesu cuh a-hlu-läk gùi awn a täng-ah Gethsemani-ah ami gok lo zah ung Jesu nawh “Kei ca-pi-ah hteit neh ka k’tài gü zah ung nangmi a si zah ung nami na om vai,” ci neh m’cäi gùi ghüt nehtah Petru lah Zebedee-ah htá goi, khah püi gùi neh a cun-ung a m’lung- ’kiong-ah thüi-hlèi neh ng’ä lo te ci. Cun kon-ah, Jesu nawh “ka sih khàw lo hleih ka thüi ci, asin-ung kei awn a täng-ah kä ip-èin neh nami om tu vai” ci neh a-hlu-läk k’thùm àm piéin neh, cun-ung-kah nawh apí-ah va hläih nehtah m’dek ung ng’bóp htá neh a k’tài gü lo cuh, “ka Pá aw, a kia hnging vai ung Sin-ah m’si bäít (Sin-ah zái-cãnák) nawh kä na k’et-èin lo vai hlü; cun-ung phih kei-ah ng’zák hlü-ah kä kia neh nang Pá-ah ng’zák hlü-ah kia hlä,” ci neh k’tài-gü ci.A-hlu-läk gùi-ah omnák ah hteit bà nehtah ngami gùi ip hngim u hleih hnguh lo gùi neh nangmi cuh, nãzi ät htá düit phih kä ip-èin neh kä nami na om püi hnging ci ang? Kä nami kat-èin hlot vai-ah, ng’ngaih naneh k’tài-gü neh om vä. M’Lung cuh, líng tuláng pang hleih phih käü tah ghói ci,” ci neh Petru àm piéin nehtah, hteit bà mä neh “Pá aw, sin-ah m’sibäít cuh, kei nawh ka áwk líng vai-ah a kia-èi täng ung nang Báwi-ah ng’zák hlü a hlo-ah kia hlä” ci neh k’tài-gü bà mä ci. Cun kon-ah, a-hlu-läk gùi-ah omnák-ah lo bà nehtah ngami cuh, ami mik nawh lein gùi hleih ami ih bà cuh, hnguh bà gùi ci. Ngami nawng gùi ghüt neh hteit bà mä nehtah aci kíäü kah-a hlo bä-ah a k’thum veinák k’tài-gü ci. Cun kon-ah, a-hlu-läk gùi-ah omnák-ah lo bà nehtah “Nami ip-èi bà ng’cang ci-ang? k’chàng-ah Htá cuh, a k’sé gùi-ah kut-ung ami àp nák vai ng’et lo ci. Let lo vä; mih hteit kò. Kei na àp khai-ah k’chàng cuh, mi pèi-zah gok lo pi ci néi,” ci neh piéin ci.
