Jesu, Jerusalem-ah a luh-ah màwg.

 Jerusalem mãng-gò k’et lo neh Htanlun m’htung-’khãn-ah om ci-ah, Bethphage pigò-ung ami gok lo zah ung Jesu nawh A-hlu-läk k’hngih tüi goi neh      Nani mà-ah om ci-ah pigò-ah hteit nä. Cun-ah pigò ung ami k’pón-ah mie nú lah a htá, a k’tén-ah nani hnguh khai. Gui k’phiàn neh nani hlo lo vai. Ami ning ng’thu-mãngnák goi ung “Báwi nawh ng’zák hlü ci. Kä so hleih ning thak-eì lo bà vai néi,” ci-ah nani piéin vai ci neh Jesu nawh m’cäi neh a tüih goi.  Cun-ah màwng cuh zan nä ce ng’sä-ah piéin te-a hlo-ah,

 “Sion-ah htá k’hngumi àm, nami m’thein tu vai cuh: Teng-ä, nang-ah Sangpùghang, hngip hngäí ci-ah m’lung awn mie nú lah a htá ung ng’cum neh ning teng lo ci néi,” ci cuh ang k’chüíp lonák vai-ah kia ci.

A-hlu-läk goi phih, hteit ni nehtah Báwi nawh a piéin te-a hlo-ah ci ni neh      mie nú lah a htá cuh, lo püi ni chü-tah a k’khãn-ah, ami zih taih u hleih Báwi ng’cùm ci.  Ng’bum ci-ah k’chàng gùi ung a k’dá nawh ami hluihlak gùi cuh, lam-ung phah u hleih a hei gùi  nawh phih, sing k’ban gùi tupit pit neh phah tu ci gùi. A hngú-mà  ng’gùi tu ci-ah k’chàng gùi nawh phih, “David-ah htá àm, Hosanna Khãnpùghí -ah ng’ming-awn lo ci-ah k’chàng cuh, bä ci néi. Khãnmòpí pum Hosanna kia hlä” ci neh m’tam ci gùi.

Jesu cuh, Jerusalem-ah lut hleih mãng-gò pum-ah akia-ah  salòng hleih m’lã u neh “Sin-ah k’chàng cuh, a u ang?” ci neh ng’si tu kiu u hleih  läk tu ci-ah k’chàng gùi nawh sin-ah k’chàng cuh Galilee khàw Nazareth pigò ung-kah, ce ng’sä Jesu néi,” ci neh piéin ci gùi.