“Khanpughi ah na ng’sei ci” ci ci gui.
Cun kon-ah, Judeu gùi nawh, Báwi cuh, vòi vai neh, lung kó ci gùi. Jesu nawh, “Ka Pá-ah bi k’ní gùi, a k’dá ka ning m’dáng gùi pi. Cun-ah bi gùi-ung-kah, a hngon-ah phäh-ah, lung awn nami na vòi ci ang?” ci na gùi ci. Judeu gùi nawh, “A k’ní na bi-ah phäh-ah kä kia ci. Khãn-pùghí na ng’ming k’pha-ah phäh-ah mo, ning voih. K’Chàng düit-ah kia nehtah mä, Khãnpùghí-ah na ng’séi ci,” ami ci. Jesu nawh, ngamí àm a piéin bà cuh, “Nami läk-ah m’cäinák ung nang mi gùi cuh Khãnpù-ghí gùi-ah nami kia ci, ka ci,” ci neh ng’guk ci-ah kä kia ci ang? Cun-ah kia hleih Khãnpùghí-ah k’chü ng’zák ci gùi cuh Khãnpùghí-ah kia ci; m’cäinák phih kä hoih-ah kia ci. Pá nawh m’théing neh khaw m’dek-ah a na tüih lo nawh, “Kei cuh, Khãnpùghí-ah Htá-ah ka kia ci,” ka ci-ah phäh-ah, “Khãnpùghí na k’chünak ci,” nami ci ci. Ka Pá-ah bi kä ka bi ung kä na zùm èin vä. Ka Pá-ah bi ka bi läí ung ka mät kä nami na zùm hlü ung phih, ka bi bo-tah zùm vä. A cun-ung vah, Pá cuh, kei ung kei cuh, Pá ung kani om cuh, nami hmat lo khai.”
Cun kon-ah, Báwi cuh, pha hlü te ci gùi; cun-ung phih, ami ng’lung-a kah, zút hlot neh phiòng-èi ci.
Jordan-ah a hei gã, Johan nawh mà neh a m’sinák-ah hteit neh a cu zah-ah om ci. K’Chàng k’dá lo u neh, “Johan nawh cäi vai tumat phih kä m’dáng ci. Cun tu pang-ah phih, sin-ah a màwng a piéin cuh a k’càng-ah kia ci,” ci neh m’thein ci gùi. Báwi cuh, a k’dá nawh zùm ci gùi.
