Egypt kho ah ka Bä ciah John ah ghünlu a mong
Egypt Kho ah ka Bä ciah John cun phih Bä ciah Joseph ah hlo ah coh ng’phlai k’chang tumat ah kya ci. A ni cu Asyut mânggo ung om ciah Lycopolis ung ng’tüi ciah kya ci. Egypt kho ah Christian k’chang gui ah ng’lak ah k’chang gui a k’da no a mi hmat ah bä ciah k’chang tumat ah kya ci. Lycopolis pei ah kho gui khan ah om ciah hlalai ung hteit ne a bang nak ung om ciah lung k’po gui cu om nak hnging vai ah a khan k’thum ah pyang ciah kya ci. A khan tumat cu ih nak vai, a hngih nak a khan cu k’khin k’pha nak vai lah a k’thum nak cu Khanpughi ah mong lam a m’thei m’thang nak vai ah kya ci. a ni cu a cun ah khan ung m’kot a k’yo hta pyang ne ei ok gui do ne ei ne ta a k’kyong ah shoh khai ne om ciah kya ci. Kho k’hngüp k’chüih ung k’hngüp k’hma cu Khanpughi awn ng’hta ng’ko ne k’poih ba ciah k’hngüp goi ung ng’müi m’cha lam ah a mong gui k’pami gui bäng awn pyein hla ne ng’hta ng’ko ci gui ah kya ci.
A ni cu kho k’hngi a ng’kyak kon ah ei ei ciah kya ci. ei a ei ung shing k’theih a chong lah k’thui an gui bäng ei ciah kya ci. A cun ah kya ne shon k’cih ah ei k’ok lah Pong muk cu kä ei ciah kya ci. A cun ah a ei ok vai ah a läk vai gui cu a kho kum 40 ung ka noh 90 ah chüt hleih ci hnging ciah kya ci. K’chang gui a k’da cu a ni ah htei ne om tu hti ci gui ah kya hleih a mi om tu nak vai ah im cu coh vai hlü ciah hngu lo ne a phan k’chang gui no k’chin gui ah om ih tu nak vai cu pyang tham ne bi ci gui ah kya ci. A ni cu k’chang a k’da no a mi m’nai tu ah k’ce ng’shä tumat ah phih kya ci. A ni cu k’chang gui ah m’lung k’kyong ah ka phih hmat ne ngami no a mi m’yih ah kat nak gui phih hmat ne m’dang pe gui ciah kya ci. A ni cu om lo khai ah ng’tukah nak ah mong gui phih hmat ne k’chang gui am m’thein kan gui hnging ciah kya ci. A ni cu AD 394 ung a shi nak vai m’chin ne hmat ciah kya hleih k’chang gui awn kä ng’hnguh ng’teng ba ne a k’shoh khai ne om ciah kya ci. Kho k’hngüp k’thum ung a u no hteit ne kä hnguh ein vai ah m’cäi gui ne ta m’khuk m’ku dong ne a k’taigü ah k’phei ah shih ciah kya ci.
