Bä ciah Turibius ah ghünlu a mong

Lima Mânggo ah Taigü Mâng tumat ah kya ciah Bä ciah Turibius de Mongl cu Christu kum 1538 ung Spain ghunkho Mayorga Mânggo ung ng’tüi ciah kya ci. Hnguh shim nak ung a kya ah ghuih ciah kyawng hta tumat ah kya ne Spain ghunkho ung om ciah Salamanca tekahto tumat ung Law ah mong lam gui m’thei m’thang ciah kya ci. Christu kum 1538 ung yum tu k’chang düt ah kya ciah Bä ciah Turibius cu Peru ghunkho Lima mânggo ung Taigü Mâng tumat ah kya ne bí a bi vai ah a mi peit ah kya ci. Taigü tumat ah kya nak vai gui ah a k’tän gui a van gah tu ne ta leng ne Khanpughi ah mong lam thähla m’thei m’thang khai ah tün ne hteit ciah kya ci. A cun ah a hteh nak ung om ci gui ah k’chang gui ka vai kho kum 25 peng peng a ghünlu a k’ni ah gänap ne bi bi pe gui ciah kya ci. A gok nak kä shop ha hleih a mi ng’thu ng’hta gui a k’ni ah k’shing lo tu ne a kho awn htet hton ghüi ne a yai ca buiawt gui phih a í ah kä ng’ngai ne k’tha na ne bi ciah kya ci. A ni cu aung tang ci gui ah Spain k’pakkhui k’chang gui ah ma ah Indian Pakkhui k’chang gui 1,000,000,000 khei ci ka a mi gah tu hnging vai gui ghung m’htei ne bi pe gui ne m’shi nak pe gui ciah kya ci.

A k’hngu ah Khanpughi ah mong lam thähla m’thei m’thang khai ah Htitheing ciah Taigü gui cu hlü ci-ah hmat lo ne Amarican k’chang gui ka vai ah mâpi k’bäih ne Seminary kyawng coh pe gui ciah kya ci. A ni cu Taigü Boi gui no m’kat ne a hlü hlü ah a mi m’shûk k’châk gui phung a í ah kä ng’ngai ne a cun ah Seminary kyawng cu a coh ah kya ci. A ni cu a kya ah k’tha na bi bi ne ta Christu kum 1606, March 23 ung shi ciah kya ci.