Messiah-ah pa-khúi ng’sòn ami piéinnák.

 Ng’Ngài tu ci-ah k’chàng a m’sah nawh cun-ah k’chü ng’za u neh, “Sin cuh, ce ng’sä k’càng ah kia ci,” ci neh piéin ci gùi.  A m’sah nawh, “Christù-ah kia ci,” ci ci gùi. A m’sah nawh, Christù cuh, Galilee-a kah lo khai ang?  Christù cuh, David-ah ng’sòn, David-ah mãng-gò Betha-lehem ung-kah, lo ’khai ci neh m’cäinák ung om ci-ah kä kia ci ang?” ci neh piéin ci gùi.  Cun-ah kia hleih Báwi-ah phäh-ah k’chàng gùi ami ng’ngaih ng’pài zop ci.     A m’sah nawh, Báwi cuh, pha hlü te ci gùi. Cun tu pang-ah phih a u nawh phih, Báwi cuh, kä va tòn zap ci.

Cun-ah kia hleih ami phàn gùi cuh lo bà u hleih k’tài-gü gùi lah Pharisee gùi nawh, “Ani cuh, a i-ah kia hleih kä nami lo püi ci ang?”ci ci gùi.  Ami phàn gùi nawh, “Sin hlok-ah a u phih kä ng’thu ng’htà  man ci,” ci ci gùi. Pharisee gùi nawh, “Nangmí phih ning m’hlè gùi ci-ah kä kia èi ci mä?”  K’Chàng ng’vái gùi-ung-kah boh, Pharisee gùi ung-kah boh, tumat kù nawh zùm tu neh ang?  Cun tu pang-ah phih, m’cäinák kä hmat tu ci-ah sin-ah k’chàng gùi läí, plah gùi-ah kia khai,” ci ci gùi.  Mü-ah lo màn neh ngamí ung-kah, phih kia tu ci-ah, Nicodemus nawh, “Mi läk-ah m’cäinák ung mà neh kä ng’si k’cà, a màwng lam kä hmat pha neh a u phih m’cha m’làng vai ci ci mâ?” ci neh ngamí àm piéin ci. Ngamí nawh phih, “Nang phih, Galilee k’chàng mâ? Galilee ung-kah, a i k’ce ng’sä phih kä thàwn khai, na hmat vai néi,” cinak ci gùi. A cun kon-ah, ami im phäh phäh-ah hteit bà zop ci gùi.