Bä ciah Maria Josefa ah ghünlu a mong

Bä ciah Maria Josefa cu Spain ghunkho, Victoria mânggo ung Christu kum 1843 ung ng’tüi ne a mi ng’nu ng’be gui ung a k’taknga pi ah kya ci. A ni cu goipyam ci gui lah dudong k’chang gui a kya ah k’chü m’gein thei ciah bä ciah k’chang tumat ah kya ci. Ng’ngahtäh ne Khanpughi awn ng’pong nak lah k’taigü nak ung m’hteng ciah kya ci. A khokum 15 be lo hleih Madrid mânggo ung om ciah a ng’kho k’chang gui ah om nak ah hteit ne om tu ne a ni ah hnguh shim nak ung a ng’thei ng’thang ah ca gui cun phih a cun ung ng’päng hleih ng’thei ciah kya ci. A khokum 18 be lo hleih a ghünlu gänap nak ah Mamah ng’htoi ung lut tu ciah kya ci. A cun ung ka no The servent of Jesus of Charity ciah Mamah ng’htoi cu m’düi ciah kya ci. A cun ah Mamah ng’htoi cu kho kum 41 peng peng khong mang ne pyang tham ciah kya ci. Läklam gui awn k’taigü nak ung m’hteng ne kä gai ci gui a m’htei m’hta nak awn a ni ah a hnguh hmat gui cu m’hteng hleih bi ciah kya ci.

 A ni no a Mamah gui am a pyein cu “ Mamah gui aw.. goipyam ci gui m’htei m’hta cu a mi eiok vail ah sei tui sei lung bäng peit gui ah kya ci ci ne kä ng’ngai ein vä. Nang mi no kä k’hmih ein ne na mi m’htei m’hta nak vai ah lam gui a k’dâ om ci. Yaica ne  m’neh m’oh ci gui awn a kyäp hta ah a täng ah om ne ngami ung hlü ci gui shui lei ne na mi gunhtot hlü ah m’lung k’nga nang mi ung a om vai hlü ci” ci ne pyein ci. Maria Josefa cu Christu kum 1912 ung a shih yah ung k’chang gui a m’htei m’hta gunhtot nak vai ah a coh ah Keiha kyawng a ng’don ah 43  m’düih ne a k’hmon ghüt hleih Mamh gui k’chang shing 1000 khe ci gui no mü k’hngüp kä ng’shong ne k’tha na ne bi bi cu gui ah kya ci. A ni no a m’düih ghüt ah Mamah ng’htoi cu khom’dek pum ung yat ne tuhgüt chüt hlü ci gui, goipym yaica ci gui m’htei m’hta gui ci gui ah kya ci.