Ng’Vái k’chàng-ah htá m’gái bà ci.

K’Hngüp goi ng’phlän hleih a cun-ung-kah, pong neh Galilee khàw ah hteit ci.  A i-ah kia hleih ci ung, “Ce ng’sä cuh a mät-ah omnák ung a i-ah kä hlui ci gùi,” ci-ah, Jesu mät nawh piéin te ci.  Galilee khàw-ah gok lo hleih Jerusalem-ah a bi te phùng hnguh tu te ci-ah Galilee k’chàng gùi nawh, Báwi cuh, dàw ci gùi. Jerusalem-ah paschal ung hteit tu te ci gùi-ah kia ci.

Cun zah ung Galilee khàw, Tui Ca-pit tui-ah a piannák-ah, Cãnan pigò-ah hteit bà mä ci. Kapharnaum pigò-ah  Báwi tumat-ah htá cuh gàw ci.  Jesu cuh, Judea khàw-a kah nawh, Galilee khàw-ah a gok cuh cun ah ng’vái nawh ng’za nehtah Báwi-ah hteit neh si ghep ci-ah a htá, a m’gái tu bà vai-ah, ng’huinak ci. Ani àm, Jesu nawh, “Nangmí nawh cäi-cat vai gùi, kä nami hnguh ung kä nami zùm khai,” ci neh piéin hleih a ng’vái nawh phih, “Báwi aw, ka htá kä sih èin pha ung lo-ä,” ci neh ng’huinak ci.  “Hteit bà-ä, na htá ghing ci néi,” ci neh Jesu nawh piéin ci. A cun-ah k’chàng nawh, Jesu-ah k’chü cuh, zùm neh, hteit bà ci.  A hteh bà zah ung a phàn-ah k’chàng gùi nawh, a na lo u neh a htá a gái lo bà-ah a màwng cuh, m’thein tu ci gùi. A i-zah ung a gái bà cuh, ng’si gùi hleih, “Zan-tá khàw ng’kì lo ung tün neh gái bà ci,” ci neh m’sàng bà ci gùi.     Cun zah cuh, “Na htá ghing ci néi,” ci neh Jesu nawh a piéin zah vai hlok, a kia cuh hmat lo neh a mät lah, a ’kiòng púm nawh, zùm lo tu ci gùi. Cun-ah a k’hngih veinák a bi-ah cäinák cuh Judea-a kah nawh, Galilee khàw-ah gok lo bà neh a m’dáng-ah kia ci.