Bä ciah Abraham Kidunaia ah ghünlu a mong

Bä ciah Abraham Kidunaia cu a kya ah ng’büh ng’mang ciah k’kyawng khui ung ka no ng’tüi lo ciah kya hleih a nu pa no hnguh shim nak gui ung a k’kni ah ng’thei ng’thang ne hnguh hmat k’chang tumat ah kya lo khai ah kyawng a ni m’kai ah kya ci. Ng’büh ng’mang k’chang ah kya ci gui ah kya hleih a nu lah a pa no a k’chumah vai a ni ci peit te hta a  m’don vai k’hngüp a ni cu dong ciah kya ci. Dong ne ta Yahteih tumat ah kya ne läk lam gui awn k’tha na ne k’taigü ne om ciah kya ci. A khoh tang a pi hta bäng sham ne a khan a k’yo hta ung om ne a kya ah a k’taigü yah ung a ngoh nak ung ka noh a kyä cu k’khan ah yong hleih a ni shui ba ci gui ah a k’kyawngkhui k’om gui no a mi k’hnguh ah kya ci. Im ah a hteh tu ba vai ah pyein ne chü tub a u hleih Abraham Kidunaia cu dam ciah kya ci. A nupa ah Khoh tang gui a k’daa gah ne a teihpüi am duyai k’chang gui am a teibo tu gui vai ah pyein ci.

A mät ka vai ah kot tumat ih nak ah phak tumat lah me vun awn a mi pyan ah ng’khuih tumat bäng htein ciah kya ci. A mät hta no läklam gui awn k’taigü ne a kya yah ung k’chang gui ka vai ah bi a bi nak awn m’thong hlat ne bi ciah kya ci. A k’hmät hmät a pei ah om ci gui ah a mi yumghong gui cu Boi Yesu lam a mi ng’hlah ba hnging vai ah a bi nak gui phih a k’daa om ciah kya ci. A cun ah a ci ah phäh ah Beth Kiduna ung om ci gui ah pigo k’chang gui no ngami gui hmong cang gui ci ci ne a kya ah a mi m’ghuih ah kya ci. A cun ah Beth Kiduna pigo ah hteit ba mä ne ngami gui cu gùp gui düt a mi m’shuuk k’chuk cu kä cang ci cu a mi hmat vai ah m’thein kan gui ne k’phon nak a mi gah hnging vai ah phäh ah ngami gui ung hlü ci gui cu ng’dang khai ah m’thein m’kan gui ciah kya ci. Ngami gui no lung awn voi u ne shih ghep ghep khai ah a mi ci ba ah kya ci. A cun ah ci tu pang lang u hleih phih kho kum k’thum peng peng Beth Kiduna pigo k’chang gui awn a täng ah om ciah kya ci. A kya ah a mi kalu nak ah hngu ah m’lung ng’shäi nak awn a täng ah om püi gui hleih a k’hngu ah m’shi nak ci tu hlü ciah gui ah k’chang gui daa lo ne ngami gui cu yum nak ung khäng htek ciah Christian k’chang gui ah kya lo ci gui ah kya ci. Abraham cu a khokum 70 ung shi ciah kya ci.