Bä ciah Leobin ah ghünlu a mong
A caä Christian yum nak ung dukhaih ci lah ng’büh ng’mang ci ne a mi m’cha ng’lang nak cu om man ciah kya ci. A cun ung ka Khanughi ah mong lam bi ci gui cu a kya ah ng’büh mang ne mang ci gui ah k’kyawng khui ung ka ni, duyai ciah lai bi k’chang k’kyawng khui ung ka ni cu om lo ci gui ah kya ci, Ni ne bä ciah m’lung k’nga cu nguighui khoh tang om hleih hlüntai hleih om ci gui ung phih om ci ci cu ngak vai ah kya ci. Leobin cu pyinhtit kho ung om ciah geitko ne vuhm’hta ne bi loh nak gui cu a k’hmo hta yah ge ung lai bi k’chang gui awn a täng ah bi lo ne om tu man ciah kya ci. A ni cu a í phih hngu hmat tu hlü ciah a m’lung k’nga om hleih Yahteih kyawng tumat ung hteit ne a kya ah a m’lung m’yo m’nem be bi bi tu ciah kya ci. A ni cu a k’hngüp yah pum ung bi bi ne ta mü ah ca k’khei ne om ciah kya ci. A ni no mü lam ah ca a k’khei nak ah mei cu mü ah ip ci gui ah Yahteih gui no kä mi ih ein hlot vai ah hmong cang ciah ng’ngai ne nompang ne kya u hleih mei cu kä k’khang ein khai ah shung pe gui ne ci ci.
A mät no hnguhmat nak gui a k’cum ah shui lei ne ci hleih yum nak lam a k’hngu ah hnguhmat nak ung a kya ah hnguhmat lo tu hleih k’chang gui no a mi m’nai tu ah kya ci. Leobin cu Lyons mânggo pei ah om ciah Yahteih kyawng tumat ung khokum k’hma hlok om ciah kya ci. Pyinhtit pakkhui k’chang gui lah Pagandi pakkhui k’chang gui ah ng’lak kä ng’gei ng’cam nak om lo hleih Yahteih kyawng ung ka no a hei ah dong ciah kya ci. Yahteih kyawng a k’teng ah lut ne tuk u hleih Yahteih gui cu a mi shi nak ung ka no a mi pyhin hnging vai ah dong ne ng’thup ci gui ah kya ci. A cun yah ung Leobin lah Yahteih a ghü bäng k’poih ghüt ci goi ah kya ci. A mi khoh tang gui gut gui vai ne a mi htin nak a hoi ci cu ng’shi goi u hleih Leobin no kei mi ung a í khohtang phih kä om ci ci ne m’shang tu ba gui hleih ng’shi ne kä mi gah ah phäh ah a kya ah a mi kalu nak ah kya ci. Khoh tang gut ci gui no Leobin cu shi khai ah ng’ngai ne kä ngon ghüt ein k’äih ne a mi nong ghüt ah kya ci. Leobin cu gai lo ba ne a dìkyäp nak ah hteit ne Yahhteih tumat vai hlü ah a ghünlu pum a khan hta tumat ung k’shoh khai ne läklam gui awn k’taigü ne om ciah kya ci. A k’hngu ah a ni cu Chartres ah TAigü Mâng ah kya lo ci. A ni cu yumtu ng’bum ung a mi bi ah ng’bum nak gui ung khong mang ne ng’thonghlah nak gui a k’dâ bi hnging ciah kya ci. Bä ciah Leobin cu Christu kum 556 March k’cha 14 ung shi ciah kya ci.
