Bä ciah Luigi Orione ah ghünlu a mong

Bä ciah Luigi Orione cu Christu kum 1872 ung Khanpughi yum äp ne k’taigü nak awn be ciah Italy Pa k’khui k’chang ung ka no ng’tüi lo ciah kya ci. Bä ciah Luigi Orione cu a khokum ga yah ung a cun ah mânggo ung om ciah Taigü Boi ah ni ciah Lam m’shüm nak awn Khanpughi ah mong lam bi tu hlü ciah a m’lung k’nga päng lo ciah kya ci. A kho kum 13 ung a pa awn a täng ah lam coh nak ung bi tu ciah kya ci. A k’hmo k’chang ah kya ne ca a ng’thei ya k’phei ah a kya ah bi bi ciah kya ci. A ni cu Tortona ung om ciah Cathedral ung paya kyawng ung a mi mang ah khoh tang gui a m’htei nak ngui shui ne kyawng a khai nak ung mang ciah kya ci. Khanpughi no a ni Taigü Boi tumat ah a kya lo vai ah lam shüm ci ci-cu yum ne a ng’kyäng ah chüt hleih a cun cu a m’lung k’nga ung htin cheng geng ciah kya ci. A khokum 20 be lo hleih k’chang gui m’thang nak awn pyangtham gui ne guhtot gui ciah kya ci.

Luigi Orione cu a khokum 1895 ung Taigü Boi ah kya lo tu ciah kya ci. Chrsitu kum 1913 ung Brazil ghunkho ah Khanpughi ah mong lam thähla ne a kho ng’shong khai ah bi nak hnging vai ah The son of Divine Providence Boiphaya ng’htoi cu m’düi ciah kya ci. A ni no bi a bi loh nak ung Khanpughi cu a k’tung pi ah a ni am a bi loh nak hnging vai ah k’tha pe ne a ni awn a täng ah om ci ci-cu hmat ciah kya ci. A ghünlu cu a k’cum ah k’taigü nak awn m’htei ne om ciah kya ci. Dupyam ci gui lah hlü ci gui ka vai ah im ni, Phaya kyawng, lah ca a mi ng’thei nak ah kyawng gui coh pe gui ci. Bä ciah Luigi Orione cu cu a m’lung k’nga ng’shung hei ne a ng’ngahtüh gui cang ciah kya hleih k’chang gui no a kya ah a mi m’nai tu ah kya ci. Yumtu ng’bum ung buiawt gui ah kä ng’hloi nak gui a ni no ci hnging ci ci ne k’chang gui no yum ne a mi u pa ah k’chang tumat ah kya ci. K’o a m’hlon nak ah omng gui cu k’chang gui no yum ngak lo u hleih yum nak lam ung mâpi k’bäih ne k’ok m’hlon ciah ciah kya lo ci. Ca uk gui pyang ne yaoih tuk vai ah bi nak gui ung phih k’tha na ne bi ciah kya ci. Bä ciah Luigi Orione cu Christu kum 1940 March k’cha 12 ung Italy ghunkho San Remo ung a m’lung a m’neh nak awn shi ciah kya ci. A ni cu Dupyam ci gui, Hmeihta gui lah a mi k’pyü im kä om ci gui lah a mi ghoh ah a k’hmo gui ghung m’htei ciah bä ciah k’chang tumat ah kya ci.