Bä ciah Maximillian ah ghünlu a mong
AD 295 ung Roma gak’gap a ng’vai tumat no Algeria mânggo ung htinpow awn hteit ne gak’kap a k’thai cu k’bum ciah kya ci. A cun ah ga k’kap a k’thai gui a k’dâpi cu ghunkho m’htei vai ah a kya ah m’lung k’nga ung kä om kyäm hleih a mi mät ah ng’ngaih ah lut tu düt ci gui ah kya ci. Gak’kap a k’pyhüm ah hta gui cu a k’cang ah ghunkho ka vai a k’ni ah bi vai ci-ah m’lung k’nga awn bi ci gui ah kya ci. Maximillian ah am a pa no ga k’kap a k’thai gui a mi k’bum nak ah a luh tu hlak yah ung Maximillian cu a khokum 11 va lo pha ciah kya ci. A ni cu dung kyä däm hla ne gai ciah ga k’kap tumat ah kya hnging khai ah kya ci. Kho ng’yo yum ne voihpeh nak gui cu Romah ga k’kap gui ah phäh ah hlü tu pi ciah kya hleih a cun ah bi loh nak gui ung Christian yum tu k’chang tumat a cumboi tu vai ah Maximillian no hmat ciah kya hleih ga k’kap tumat ah a kya vai cu dam tu pang lang hleih phih ling ne ga k’kap gui ah seal cu a mi peit ah kya ci. “ a ni no a pyein man gui a guk nak ung a mi hnguh ah a ca cu ..
“ Kei ah ga k’kap cu Khanpughi ah ga k’kap ah kya ci. Kei cu shin ah kho m’dek ka vai ah kä ka ng’tukah hnging khai. Kei cu a shin ah ng’tukah nak ung kä cumboi tu hnging khai” ci ne a pein hleih Romah ga k’kap a ng’vai no “ A í ah kya hleih shing ah na ling khapeng ang? A u no shin ah na m’lung k’nga nak vai a ni tok ang?” ci ne ng’shi hleih “ Kei ah m’lung kyong ah kei na chü ci tumat ah phäh ah kya ci” ci ne m’shang tu ba ci. Roma ga k’kap a ng’vai cu Maximillian ah a pa lam ah ng’hlat ne na hta na m’cäi vai ci ne pyein hleih a pa no “a mät ah yum nak lam a mät no hmat ci. A ni ah phäh ah ni tu pi ciah a ng’ngaih a mät no a bi vai ah kya ci” ci ne pyein hleih Ga k’kap a ng’vai no Maximillian am ga k’kap ah a kya nak vai ah seal pe hleih Maximillian no Kei no shin ah seal cu kä do hnging khai, Boi Yesu Christu ah seal kei ung om püi ci, shing ah seal cu a phu kä om ci. Shüng ne om ciah Khanpughi ah hta , kei ah ka Boi Yesu Christu ah seal cu kei no ka do püi ciah kya hleih shin ah seal düt ka k’hngügon ung kä ka awi hnging khai ci ci ne pyein ci.
Roma ga k’kap a ng’vai no Maximillian cu m’cäi ne ghunkho mong lam bi vai cu k’hmo tho gui no a mi bi vai ah kya ci. Kei mi ah khong mang k’chang gui gunhtot ne bi bi ci gui ah Christian ga k’kap gui om ci gui ci ne pyein hleih Maximillian no Ngami gui cu a mi mät ka vai ah a k’ni pi hngu ne bi ci gui ah kya ci. Kei cu Christian tumat ah ka kya ci. Kei ah m’lung k’nga no nang ah ga k’kap ng’htoi ung om ne ghunkho mong lam ka bi vai ah kä na k’bäi ci ci-ne pyein hleih ga k’kap a ng’vai no cun ah akya ung a tuh k’bäih k’sheng ne nang ah Christu ah ka ni khah ba püi kha ci ci. Maximillian no m’shang ba ne shin ah ta ni pi ci a í kä om ba khai, kei kä ka dí khai, Shin nak ho m’dek nong ne ka hteh ung kei ah ng’müi m’cha cu ka Khanpughi, ka Boi Yesu awn a täng ah ghüng ne ka om khai ci ne pyein tu ba hlei Maximillian ah ng’ming cu ga k’kap gui ung ka no k’pät ne ta ngon khai gui ah a mi pong lo yah ung a ni awn a täng ah om tut e ci gui am cang lam ung a mi ling gai vai ah m’cäi gui ghüt ciah kya ci. A ni ngon ciah k’chang ah hta gui am a hlui hlak a k’thai gui a peit vai ah a pa m’cäi ghüt ciah kya ci.
