Roma Mânggo ung ka Bä ciah Frances ah ghünlu a mong

Bä ciah Frances cu Christu kum 1384 ung Roma mânggo ung om ciah hlüngtai k’chang k’bä k’kyawngkhui ung ka no ng’tüi lo ciah kya ci. A ni cu Mamah tumat ah kya tu hlü lang ne phih a nu pa ah k’chü ng’ngai ne Lorenzo Ponziani awn a khokum 13 ung lethat ci goi ah kya ci. Ngani cu khokum 40 peng peng a täng ah om tu pang lang ni ne a ni ng’ngaih kä hmat nak ci cu kä om man ciah kya ci. A ni cu kyünhloi nak gui awn k’taigü ne duyai k’chang gui gunghtot gui ne goipyam ci gui om nak ah htei ne teng m’kyein gui ne ci ciah kya ci. A ni cu k’thum ah hta ne a hta gui am a mi k’hmo hta yah ge ung Christian yum nak gui a k’ni ah m’thei m’thang gui ne a ci gui ah kya ci. A hta goi k’hngih shi ni ne, a hta a k’hmo pi a mi lak ba peit ah phäh ah a kya ah thüi hlei a kya gui cu a yum nak awn a m’lung ng’shäi khai ah pyamtham ne om ciah kya ci. A ni a I ah kä hngu tu ne kalu nak ciah a hta ah k’chu ah khan ah k’chü m’gein nak lah m’lung ng’shäi nak awn a hta ah k’chu ah m’hngi nak cu a gah vai ah ci ciah kya ci.

Christu kum 1425 ung Khanpughi am a gänap hnging vai lah du ne pyam ci gui ka vai ah bi a bi peit nak hnging vai ah Oblates of Mary ( The Oblates of St. Frances of Rome) ng’htoi cu m’düih ciah kya ci. A k’kyong ka a shih kon ah a mi ghünlu gänap ci gui no a mi hlui hlak ah hlui gui do ne geinvai ne a í ah kä mong tu pi ciah Mamah tumat ah kya ne om ciah kya ci. Christu kum Bä ciah Frances cu 1440, March k’cha 9 ung shi hleih Roma ung om ciah Santa Maria Nova ung a mi k’phuh ah kya ci.