Bä ciah John of God ah ghünlu among
Bä ciah John cu Christu kum 1491 ung Portugual ghunkho ah ng’tüi ciah kya ci. Spain gak’kap ng’htoi ung ghunkho lam bi tu ne a cun ung kä ni ci gui a buiawt tu kon ah a kat nak gui ah phäh ah ng’yu ba ne Khanpughi am a mät no a mät gäap khai ah a m’lung phukpit ciah kya ci. A kho kum 40 ung John cu cang lam ung a hngun pe khai ah a bü ceng nak awn Spain ghunkho ah hteit ba ne Kranada mânggo ung yum nak lam ung ng’hlüngtai gui ah phung gui lah ca uk gui leng ne yoi tuk ciah kya ci. Christu kum 1538 ung John cu Avila mânggo ung om ciah John ah Khanpughi ah mong lam thähla m’thei m’thang gui a kya ah yum ne a k’gù tumat vai hlü ah a om k’ih a ng’hta ng’ko gui kya hleih k’chang gui ah m’lung k’nga a mi pyantham nak ba ah seiyung ung a shäng shäng a mi khah püi ah kya ci. A cun ah a buiawt gui ah phäh ah John cu goipyam ci gui, lah dûyai k’chang gui a mi m’htei nak hnging vai ah seiyung a k’thai tumat hlü ci ci-cu hngu lo ne Christu kum 1539 Kranakha mânggo ung a teihpüi gui a m’shah awn Brothers of Hospitallers ci-ah ng’htoi cu leng ne m’düih ciah kya ci.
A ni ah kä ng’thu ng’yih tu thei ciah a m’lung nga a om ah phäh ah Tai mânggo ung om ciah Taigü Mâng no Khanpughi ah John (John of God ) ci ne a ming a peit ah kya ci. A ng’yoih yah ung “K’chang gui am a k’ni vai bi peit yah ung mät no mät phih a k’ni vai bi vai” ci-ah ng’lungloh ng’äi m’cu hti ciah kya ci. Kho k’hngüp ä tung Taiü Mâng no ngami ah sei ung cu kä ni ciah k’hngumi gui ah om nak ci ne a puk ah a mong ng’shi hleih John no a m’lung m’yo m’nem nak awn kei ah sei yung ung kei bäng ne kä ni ci ka om ci ci ne pyein ci. John cu Christu kum 1550 ung Papa Shangpughang XIII Leo no Seiyung gui ghung m’htei ciah bä ciah k’chang tumat ah thähla ne a m’thein kan ah kya ci.
