Bä ciah Perpetua lah Fecility ah ghünlu a mong

Cartage mânggo ah cang lam ung a ni hngun pe ci goi ah Bä ciah Perpetua lah Fecility ah mong lam cu Christian k’chang gui ah m’lung k’hngüt hngok hnging ciah kya ci. Cartage mânggo ah bä ciah k’hngumi hta tumat ah kya ciah a khokum 22 lo ciah bä ciah Perpetua cu hta k’pa tumat ah Nu ah kya ne Felicity cu k’hmo yah ciah phan k’chang tumat ah kya ne a cun yah ung a ni cun phih kyämah ciah kya ci. Christu kum 203 ung Christian gui kalu nak ciah Septimius Severus no a uk yah ung ngani lah Christian yum nak un glut tu khai ah pong ci gui ah k’chang k’thum awn a täng ah a mi pha gui ah kya ci. Thong khui un glut hlü ne lut tu ciah Tahmah Saya Sartuous no ngami gui cu m’shi nak a peit gui ah kya ci. Perpetua no a hta cu yum hei k’chang a pa ah kut ung a m’ap ah kya ci. A cei no a cun ah kä ci ein vai ah ng’hui na hleih phih Perpetua no a ni ah yum nak cu kä nong ciah kya ci. Fecility cu thong khui k’kyong ah hta ne a hta cu a teihpüi gui Christian gui no a mi m’htei peit ah kya ci.

A mi ng’shi k’ca nak ung nami cu a mi yum nak ung ling ne m’hteng ne kya u hleih ghatghum ciah bung k’om kong k’khom, m’na gui am a mi m’ei gui vai ah k’chü a mi cha ah kya ci. Ngami gui kongk’khom, m,na gui no a mi ei vai dan tu ci gui ah ma ah Salan ng’äi ne tumat no tumat dìmkyäp nak pe tu ng’kyu ne lut lo ci gui ah kya ci. Ngami gui ung ka k’thum cu kong lah k’khom no a k’pit a m’ton ah kya khai ah a mi khaih ne a mi ei ah kya ci. Perpetua lah Felicity cu ghatghum ciah m’na ah ma ah a ni kut ng’ven ne ng’düi ci goi ah kya ci. m’na yeng gui ah a mi k’kyi no ngani ah pumkyä cu leng leng ba ne hluk goi u hleih a ni kyä pum shi ng’hlui ah kyühkyok vai ah hleim ci goi ah kya ci. A k’hngu ah ngani cu dan tu ci gui ah lai ah khah püi goi ne m’gan awn m’chünpit goi ne a mi ngon goi ah kya ci. Perpetua cu a ni ngon khai ah k’chang a kut cat ne kya hleih a k’hngü ah k’khan ah taih pe ciah kya ci.