Bä ciah Romanus lah Lupicinus ah ghünlu a mong

Romanus cu Christu kum 390 yah ung Pyinhtit kho ah ng’tüi ciah kya ci. A ni cu Swisland ghukho lah Pyinhtit ghunkho a ni ng’gü ung om ciah khom’htung kho ghui gui lah shing ghüng gui a a daa nak ah Jura m’htung ung a mät hta a hteh yah ung a khokum 35 lo püi ciah kya ci. A ni cu hlalai ung om ciah Pa ng’vai gui ah ghünlu a mong lam gui guk nak ah Cassian ca uk ni geit m’shi a m’sha lah k’cham a bi nak vai gui cu hteh püi ne htei ciah kya ci. Bienne kho lah Aliere tui nu a ni ng’chum nak a kya ah hlak ciah Waldan tui k’büm ung läklam gui awn ghünlu k’tha na ne k’taigü ne om ciah David Thoreau vai hlü ah a ghünlu leng ciah kya ci. A ni cu a ghünlu a k’hngüp täi ca k’khei nak, Khanpughi ah tüipyan gui a mong shuilei ng’ngahtüh nak, k’cham gui m’htei ne bi nak lah k’taigü nak gui awn ng’päng hlak ciah kya ci. A ni ah om nak ah hteit ne om tu ci gui cu a k’hmät hta bä k’chihla shui ci gui lah bumhngu ah om ne yeikyai ci gui ah k’chihla gui ah kya ci.

Khokum a sho lo ah ci ah a ni ah hlo ah Khanpughi yumäp ne k’taigü gänap tu hlü ci gui cu a ni ah om nak ah tumat k’hnih hti ah gok tu ciah kya ci. A cun ah htei tu ci gui ung ka tumat cu a mät ah a nà Lupicinus ah kya ci. A k’hngu ah ngani ah a ni be gui lah a hei k’hngumi hta gui cun phih gok tu ci gui ah kya ci. Ngani a ni ng’phäi na cu gok tu ci gui ah om ih nak vai gui a ng’hloi vai ah phäh ah Yahteih kyawng tumat co khai goi ah a ni m’lung phupit ne co ci goi ah kya ci. A cun ung om ciah Yahteih gui cu a k’tung pi ah bi bi ne hlui k’kho gui hlui ne om ci gui ah kya ci. Shing awn a mi pyan ah kho dok ng’leh u ne a mi ei ok gui phih a mi geitko gui a lang hta ah ei ok ci gui ah kya ci. Romanus cu Christu kum 460 ung shih ciah kya ci. Romanus a shih kon ah Lupicinus cu kho kum 20 k’däih ne ghüng ba ghüt ne k’taigü nak lah läklam gui awn a ghünlu m’htei ne om ciah kya ci.