Bä ciah Montanus lah Lucius ah ghünlu a mong

Bä ciah Montanus lah Lucius no a ni mät no a ni guk ah ca ng’lep goi thong khui k’khong ah a ni om yah ung a ni yaica geinvai man gui m’dang ne a ni guk ah kya ci. A cun kon ah ngani a mi ngon yah ung hngu tu ci gui no a mi pyein gui cun phih om ciah kya ci. Ekaret Shangpughang Valerian cu kä ng’pyhüi ng’chang tu pha ciah Christian yumtu ng’bum cu a kya ah kalu na ne ci man ciah kya ci. Christu kum 259 ung a mi pha gui ah Christian yum tu k’chang 8 ung kah Montanus lah Lucius cun phih a mi pha tu goi ah kya ne a hei thong khui k’om gui a mi om nak a kya ah ng’ü ng’awih ciah m’dek k’kaa ah a mi chum gui ah kya ci. Ngani cu a cun ung k’cha a k’sho om ni ne coi gha ne yai ci goi ah kya ci.

Ngani a mi ngon nak vai ah khah püi goi u ne ta ngani kä mi ngon goi pha ung  a k’hngu pi ah a ni pyein hlü a ni pyein ghüt vai ah a mi pyein ah kya ci. Lucius cu a k’htük ge ah a kyä kä gai ciah kya hleih k’chü kä m’daa tug e ciah kya ci. M’kha ät hta düt phih a í phih kä pyein ne kya hleih a cun ung a mi ngon ah kya ci. Montanus cu a kya ah k’tha m’cüng ne Phvónlonak ung om ciah … ng’thu k’ni cu leng leng ba ne pyein ah kya ci. A ni cu a mi yum ng’pheng ciah Christian gui m’shuuk chaak gui ne yum tu k’chang gui kä kyühkyom ein ne a mi yum nak ung a mi khäng htek hnging vai ah k’nga k’phlang gui ciah kya ci. A ni cu a ni ah k’taigü nak cu a cun ung om ciah k’chang a van no a ng’yak hnging vai ah k’khân hleih m’cu ciah kya ci. Roma ga k’kap gui no tumat a päng ung tumat ah ngon gui ne Montanus cun phih a mi ngon ah kya ci.