Bä ciah Polycarp ah ghünlu a mong
Bä ciah Polycarp cu AD 69 ung ng’tui ciah kya ci. Roma Mâng imu ng Greek ng’thu awn a mi ng’hta ko nak ah hngu ah ome ne ng’vai lo ciah kya ci. A ni cu ng’thu k’ni guk ciah Bä ciah Yohan ah a hlu läk k’chang tumat ah kya ne Yohan no Christian yum nak ung a k’plon lo tu vai ah ci pe ne Smyrna mânggo ung Taigü Mâng ah kya lo khai ah a m’hlüng tai ah kya ci. Taigü Mâng Polycarp no mi mi gui ah ng’ngaih u nak lah mi ng’shunghei nak k’chü khan cu kä ng’düm ein ne mi k’kot chenggeng ko ci ne m’thei m’cäi ne a cun ah ng’ngaih u nak lah m’lung ngaih ah ng’shunghei nak cu mi mi gui ah kat nak gui shing m’kang k’tung k’khan ah Boi ah kyä ung ng’hlüh ci ci-ne pyein ci.
Bä ciah Yohan ah hlu läk k’chang tumat ah kya ciah Irinaus no Frorinus am a guk ah ca ung “ kei no nang am k’chang k’bä Polycarp no ngo ne Khanpughi ah ng’thu a m’thei m’cäi nak ka ning m’thein hnging ci. Kei ah ng’ngahtüh nak ung a ni ah a htehhton k’om ih gui ah htintheing a omk’ih gui, a ni ah htingling nak awn be ciah a müihmaim k’chang gui a m’thei m’cäi gui cu ng’ngahtüh ne ka hnguh ciah kya ci. Bä ne ni ciah Polycap cu Boi Yesu awn a täng ah a ni om yah ge ung ka no tün ne Bä ciah John lah a hei k’chang gui a í hok cha a ng’hta ng’ko püi gui man, ngami gui ah m’gong ung ka no a mi pyein hlak gui cu ka mät no ka ng’yak ci vai hlü ah kya ci ci-ne guk ciah kya ci. A ni cu Smyrna mânggo lam ung hteit ne Roma Mânggo ah pha ne a mi khah püi ah cang lam ung a hngun pe khai ah Igatius a mi chihkon nak ah m’shi gúi cu üm ne k’hngam ciah kya ci.
Christu kum 155 yah ung ghunkho mâng gui no a ni shui u hleih a ni cu bung ah om ciah im tumat ung dong ne om ne ta a ng’däih ah k’taigü ne om ne ta a k’hngu ah a shiv ai gui among cu m’dang nak hnguh ciah kya ci. A cun ah kya hleih a ni no a teihpüi gui am kei cu a k’ghüng ah mei awn na m’chih khai gui ci ne m’thein gui ciah kya ci. Ghunkho ung a ng’vai k’hngih no hteit ne pha ni ne ta a mi ng’yak hlü gui a läk vai ah pyein u hleih Polycarp no nang mi ah k’nga k’phlang gui ah hlo ah kä ka ci hnging khai ci ne pyein ghunkho ng’vai gui cu m’lung k’she u ne Yahta ung ka no ghot u ne ta a cun ung ka no a mi ngon ah kya ci. Bä ciah Polycap cu Boi Yesu yum nak ung m’hteng ciah bä ciah k’chang tumat ah yum tu ng’bum ung Khanpughi ah bi bi ciah pa ng’vai tumat ah a mi m’hlüng m’tai ah kya ci. Bä ciah Polycap cu a k’nga m’neh ci lah a poi m’neh ci gui ghung m’htei ciah bä ciah k’chang tumat ah kya ci.
