Báwi Jesu, khaw-’nget nawh hla lái-ah  a tóknák.

Cun kon-ah  khàw-nget nawh a tók vai-ah phäh-ah, Jesu cuh,  Htí-théing ci-ah Muh nawh  Hla-lái-ah khah püi ci.  Jesu cuh k’hngüp k’phlikip lah mü k’phlikip ung tui èi a hloi kon-ah coí gha lo ci.  Ng’Tók ci-ah khaw-’nget nawh lo-síneh “Khãnpù-ghí-ah htá-ah na kia ung sin-ah lung gùi cuh, èi vai-ah ng’lat khai ah na bi vai” ci ci. Jesu nawh m’sàng bà neh “m’cäi cã ung ami gukcuh èi áwk vai-ah ng’khaw bäng-awn k’chàng ghing ci-ah kä kia ci. Khãnpùghí-ah  k’chü päng-awn phih k’chàng ghing ci,” ci ci.

Cun kon-ah khaw-’nget nawh ani cuh, Jerusalem khàw-ah hteh püi neh ng’bum im-ah ’khãn-ah ng’düih püi nehtah “Khãnpùghí-ah htá-ah na kia ung  zu ng’htò-ä. A i-ah kia hleih ci ung m’cäi cã ung, ‘Khãnpùghí nawh  nang kavai-ah Khãnhta-pup gùi zu k’tüì lo hleih na khaw lung nawh kä ning ploh eìn khai-ah, ami kut awn ning chàng khai gùi’ ci-ah ng’guk ci,” ci neh pien ci.  Jesu nawh phih, “m’Cäi cã ung ‘na-Báwi Khãnpùghí kä na tók eìn vai néi’ ci-ah ng’guk ci,” ci neh a m’sàng tu bà.

Cun kon-ah khaw-’nget nawh a ng’htéi-ah hlüng ci-ah khaw m’htung tumat-ah khãn-ah ani khah püi neh khaw m’dek khãn púm-ung ghun khàw gùi avan lah a cun ung khawh-tang gùi avan  k’hmuh tu nehtah “Ka khaw kùng-ah ng’bóp htá neh nàna sum-chuk-ung, sin gùi avan ka ning pe khai,” ci neh tók bà mä ci. Ani-àm,  Jesu nawh “Nang  khaw-‘nget, hteit-ä! ‘Na Khãnpùghí Báwi bäng,  zùm m’hni neh ani bäng na sum-chuk vai,’ ci-ah m’Cäi cã ung ng’guk ci” ci neh m’sàng tu bà ci.

Cun-ah kia chü-tah khaw-’nget nawh ani hteh tá ci. A cung, Khãnhtapup gùi lo u neh a ng’zák hlü-a hlo-ah m’hteí m’hta ci gùi.