Orleans Mânggo ung ka Bä ciah Eucherius ah ghünlu a mong
Bä ciah Eucherius cu k’chang ah ghünlu ung ghün om nak cu a shä hta ah kya ci ci cu hmat ciah kya hleih a ng’täih ah ghün nak a m’lung k’nga ung kyem kheng geng ne ghüng om ciah kya ci. A ni cu Christian m’thei m’cäi nak ah k’kâ ung ka no a ghünlu ng’vai lo ciah Pyinhtik pa k’khui chang tumat ah kya ci. Christu kum 714 ung a im ung ka no ng’düi lo ne Normandy ung om ciah Benedict Yahteih kyawng ung lut tu ciah kya ci. A ni cu a dümhta ah k’taigü nak läk lam gui awn khokum a k’sho k’chang gui ah ta nga tu ba pi hleih khoum a k’sho a om kon ah Orleans mânggo ah Taigü Mâng ah kya lo ci. Taigü Mâng ah a kya lo yah ung a ni cu a khokum 25 vah lo pha ciah kya hleih Taigü Mâng ah bi a bi vai ah Yahteih kyawn ung ka no kä ng’düi lo hlü ciah kya ci. A htü ah a m’lung kä gang tu lang pang hleih phih k’chang gui no a mi m’nai tu ah k’chang a k’dâ ka vai ah a í phih ng’hloi ng’hlak hleih bi lo hnging pe gui ciah khong mang k’chang tu mat ah kya lo ci.
Charles Martel cu k’chang gui no a mi ng’ngaih tu, a mi kyüh aa tu ah ghunkho mong lam bi lo ciah k’chang tumat ah kya ne yumtu ng’bum ah ngui gui la ne mang ne ta Arup gui ng’nängkan püi ci gui ng’hngu ng’tuk püi khai ah bi loh gui bi ciah kya ci. A cun cu Taigü Mâng Eucherius no kä k’bäi ne ng’hngu ng’tuk püi hleih Taigü Mâng Eucherius cu pha ne a mi chum ah kya ci. A cun ung ka no Christu kum 737 ung Germany ghunkho Cologne lah Belgium ghunkho Liege mânggo ung kho phung a mi k’täm ah kya ci. Taigü Mâng Eucherius cu Liege mânggo ung a ni ngäng ci gui ah m’nai tu nak cu gah ciah kya ci. A ni no a m’lung m’yo m’nem ne a í phih do ne a ngaih hlü ah m’lung k’nga a om ah phäh ah k’chang gui no a kya ah m’nai tu ci gui ah kya ci. Thong khui ung a mi chum vai k’äih ah a ni ung kat nak a í phih kä hngu ci gui ah kya hleih St. Truiden Yahteih kyawng ah a mi ap ba ah kya ci. Taigü Mâng Eucherius cu a cun ah kyawng ung a shih ah chüt hleih a düm hta ah om ciah kya ci.
