Papa Shangpughang ah ng’thu
Papa Shangpughang no Dogmatic Constitution Lumen gentium a mong a k’tung pi ah pyein ne-ta Yumtu ng’bum cu ng’dang ne thûk caih a mong ah kya hleih ng’cha ng’tai ciah k’chang pak’khui gui ah ng’lak ung ät nak ba ah lam ah kya ci. Khanpughi no a mät no a mät a í hok cha m’dang ne a ghü, a hta Boi Yesu Christu ung ka no k’chang a van a ni awn a ät lo hnging vai ah Khanpughi ah bä ciah a bi lo vai gui ah m’hngi nak om ciah thûk ciah a mong a m’dang cu mi hngu ciah kya ci. A k’cang ah a cun ah thûk ci ung ng’bum im ah a tün nak lah a bi loh nak a ni ni k’hngih cu mi k’shing lo ciah kya ci. Vatican II Council ung Lumen gencium lah ng’bum im ah k’thûk ciah mong a pyien nak ung Bä ciah Polu no Ephesus m’cäi ca ung a guk ah “a yan a mi thuh man gui tuchü a mi m’dang lo” ci cu pyein ne a cun cu Khanpughi ah bü ceng ah kya hleih Boi Yesu Christu awn ng’gei cam ba vai ah bi loh nak ung a hngun k’ghüng päng a van a ät ba vai ah Shing m’kang k’tung ung a na shi nak awn ng’päng ne awng-tang lo ciah kya ci. K’chang gui lah k’chang pak’khui gui ah ng’lak ah a mi ng’cha ng’lang nak cu m’dí k’hmaih ciah Boi Yesu ah m’hngi nak ah phäh ah mi mi gui cu ät ne mi om vai hlü ci.
Thûk ciah a mong cu k’chang a van ka vai ah Khanpughi no a ng’kyüm be hlak hlü ah mong gui a ng’dang vai lah k’chang gui a van lah kho m’dek pum a cumboi tu hnging vai ah kyäp kyäp ah ng’shong ne a ng’dang lo hlak vai ah phäh ah kya ci. K’chang gui cu a mi m’lung k’kyong ah ät hlü ci gui ah m’lung ngaih om tu lang pang hlei phih k’chang gui mät no kä ci hnging ci gui ah kya ci. Cun tu pang ah phih Boi Yesu ah bi loh gui cu Muh Khanpughi ah m’yung aa awn a cun ah ng’cha ng’lang nak cu m’ät ba hnging ciah kya ci. Ng’thu k’ni no a mi thei m’cäi yum ne a täng ah läk cu Boii Yesu no Shing m’kang k’tung ung ka no a na k’nga k’phlang gui tumat ah mi gah khai ah kya ci. A cun cu Khanpughi ah m’hngi nak a ng’tai ah ng’dang ciah kya hleih a ni no a täng ah a na chü khong gui ci ne mi hmat ciah kya ci. A cun ah kya hleih Thûk ciah a mong lah yum tu ng’bum ah ng’lak ung ng’chum ci cu yumtu ng’bum cu ng’dang ciah thûk ciah mong ah kya ci. Yumtu ng’bum cu Boi Yesu ah yaca buiawt nak lah shih nak ung ka no a ghün lu ba nak awn a m’düih ghüt ah ät nak cu tuchü kho m’dek k’chang gui no ng’dang khai ah a mi hnging ah kha hleih a wn cu “ng’dang nak” tumat ah kya ne Khanpughi no k’chang gui a mät ung ät hlak gui vai ah a bü ceng nak cu ng’bum im ung ka no aunting hlak ciah bi loh nak tumat ah phih kya ci ci ne pyein ci.
Source: Vatican News
