Lausanne mânggo ung ka bä ciah Boniface

Bä ciah Boniface cu Christu kum 1183 Belgium ghunkho, Brussels Mânggo ung ng’tüi ciah kya ci.  K’chang päng no  van no a m’nai tu vai ah awngtang hnging ciah kä kya ci. Cun phih a m’lung kyak ne a tüi hlei nak ah k’hngüp läi cu k’hmät bäng ah kä kya hleih buiawt ne cang ciah Christian yum nak ah ghünlu ung om ciah kya ci. A cun ah ghünlu awn om man ciah Belgium ghunkho, Brussels ung a ghünlu leng lo ciah Boniface ah kya ci. A ni am ca m’thei tu man ci gui ah Sayamah gui cu La Cambre ung om ci gui ah Mamah gui ah kya ci. A ni cu a khokum 17 be lo hleih hlüngtai ciah hnguh hmat nak gui a ng’thei tu vai ah Pari tekahto ung a mi tüih ah kya ci. A cun ah kyawn ung a ni cu hnguh shim nak ung a kya ah ghuih ciah kyawng hta tumat ah kya lo ci. A ni cu Christian yum nak gui m’thei m’thang ciah k’chang a k’daa no a yum nga tu ah kyawng Saya tumat ah kya ne kho kum 7 Pari mânggo ah om ciah kya ci. Tekahto kyawng ung om ci gui ah Saya, Saya Mah gui ah ng’lak ah kä mi ng’khot ng’gei nak gui a om ah phäh ah ca a m’thei nak ung ka no a mi ng’düm hlak ah kya ci.

A cun ung ka no Boniface cu Cologne mânggo ah ng’phlon ne Catedral Phaya kyawng ung ca  m’thei tub a ciah kya ci. Catedral Phaya kyawng ung kho kum goi ca a m’thei tuk on ah a ni cu Taigü Mâng tumat ah kya lo ciah kya ci. Taigü Mâng Boniface cu a ni ah bi loh vai gui yeikyai nak awn do ne a kya ah k’tha na ne bi bi ciah kya ci. Boi Yesu ka vai ah a k’cang ah bi bi ci gui no a mi buiawt ah m’lung ah thüihlei yaica nak cu a ni no phih buiawt ciah kya ci. K’chang gui awn ng’ngaih kä ng’hmat nak lah  ng’hngu ng’tuk püi ne a k’cum ah a mi  ghüh tu nak gui cu kho kum k’sho buiawt ciah kya ci. M’lung k’ni awn läi ka te ci, a m’lung k’she nak ah phäh ah a ni awn a täng ah ng’toi ne bi ci gui ah Taigü Boi gui a mong lam cu k’chang gui ah hmat tu vai ah a pyein ein ah kya ci. Ng’hngu k’tuk ne kä ng’gei nak gui cu däm lo pihti ne Ekaret Shangpughang a k’hngih nak Frderick no phih Taigü Mâng Boniface kä yei lo nak ciah kya ci. Christu kum 1239 ung ghatghum ne kä ni ci gui ah k’chang a m’sha no bung hngu ah ng’thup ne tu u hleih a kyä leim ciah kya ci. A cun ung ka no a k’tha phih kä om lo ba ne a m’lung phih ng’kya lo hleih Taigü Mâng ung ka no ng’düm ne Brussel ung om ciah La Cambre Mamah kyawng ah hteit ba ciah kya ci. A ni a shih nak ah Christu kum 1265 ah chüt hleih a cun ah Mamah kyawng ung om ciah kya ci.