Servite ng’htoi m’düih ci gui ah bä ciah k’chang k’chüih a mong
Nu Maria ah k’phan k’chang gui ng’htoi cu Monrte Senavio m’htung ung Florence Mânggo ung ka htitheing ciah k’chang k’chüih no a mi m’düih ah kya ci. A cun ah k’chang k’theing gui cu Bonfilius, Alexis Falconieri, Manettus, Amideus, Hugh, Sostene lah Buonagiunta gui ah kya ci. A cun ah k’chang k’chüih ung ka k’thum cu ceimah püi ci gui ah kya ne k’hngih cu kä ceimah ci goi ah kya ci. Ng’phät lo pi ciah a cun ah mânggo cu ghunkho lam ung a phäh phäh ah ng’cha ng’tai nak lah yum nak lam ung kä hngün thoh nak gui awn ng’con ciah kya ci. Nu Maria m’hngi yei nak ung ät ci gui ah a cun ah k’chang k’theing k’chüih cu Frorence mânggo k’taigü nak lah ni ciah bi gui biloh nak awn a mi pyantham ba hnging vai ah a mi m’lung phukpit ci gui ah kya ci. Christu kum 1233 ung Numaria Khanmopi ah a mii kai püi ah poi hngüp ung a cun ah htitheing ciah k’chang k’chüih cu Numaria ung ka no k’taigü nak lah dìmkyäp hleih om nak ung a mi yeikya hnging vai ah k’tha peit nak ah m’dang nak cu gah ci gui ah kya ci.
A cun ung ka noh ngami gui cu a mi shako ah nguighui khoh tang gui du ne pyam ci gui am peit ta ne a mi k’kyong khui k’om gui ah hlü khai gui k’hmüt m’shei pe gui ne ta a mi mät no a mi mät cu Khanpughi am gänap ci gui ah kya ci. Ngami gui cu Morte Senavio m’htung ung cäicat vai ah läklam guia wn a kya ah k’tha na ne om ci gui ah kya ci. Christu kum 1240 ung Taigü Mâng Padingo cu ngami ah om nak ah hteit ne ngami am a pyein cu” Nangmi ah läklam om k’ih gui cu a mät ng’hlih pyo lo düt ciah tuipyan gui awn täng ciah kya hleih ng’ngaih na vä. Ng’müi m’cha ah ga cu a shäng shäng a mät no a mät a khang nak ah khantapup vai hlü ah ng’shei ne lo ci.” ci-ne m’cäi gui ne ta Khanpughi ah k’ngaphlang nak na mi gah vai ah a k’ni ah k’taigü ne om vä ci ne m’cäi gui ciah kya ci. A cun ung ka no kä shop ha hleih Nu Maria ah m’dang nak cu a k’hngih vei nak ung gah ba ci gui ah kya ci. Nu Maria no htikan a le k’kot ne Khanhtapup cu Numaria ah k’phan k’chang ci ne ca ng’guk ciah ca ng’lep k’choh cu hngu ci gui ah kya ci.
Nu Maria cu a cun ah htitheing ciah k’chang k’chüih am a ni ah k’phan k’chang gui ah a ghü gui ah kya ci lah hninkan a le hlui ne Bä ciah Auguatine ah läklam gui awn a mi ghünlu a mi gänap vai ah m’cäi gui ciah kya ci. Taigü Mâng ah ng’hui nak awn ngmi gui ung ka k’chuk cu Taigü Boi ah kya lo tu ci gui ah kya ci. Koyin Alexio cu a ni ah m’lung m’yo nem nak awn Taigü Boi ah a kyat u vai cu dam ciah kya ci. Christu kum 1304 ung Nu Maria ah k’phan k’chang gui ng’htoi cu Papa Shangpughang Benedit XI no Nu Maria ah k’phan k’chang gui ng’htoi cu yumtu ng’bum am a thähla ne a m’thei m’kan ah kya ci.
