Khò chà mêi lah a khòtüî pèinglèng
Tuhchü cuh khò a chà nak lèng lo ba ca kya ci.Khò chà lo ba ca kya neh shing hngah gui kchong neh kyói lo ci.Khù mhlâi gui ket neh mgúm lo yop ci. Aktúng pí ah gàmkhò täng ah a kya ung khò phih ngling lo ba neh thùikhò a tah phih mdek cuh kchong tu ba neh shingghing khù mhlâi gui phih ket tu ba neh kchong tu ba ci.Acun ah kya neh avan noh mêi a ngngaih nak vai hlü ci.Kchò shêi o ci gui noh mei a pihta düt ami mchí ung phih acun ung ka noh mei a lô ung a gâmkhò púm úi hnging ca kya ci. Cun kòn ah kkhòi shim ci gui noh phih kyai,lòng yung ah hteit neh ngá shùi ci gui no phih kyai,hlá nghòt neh ngkhài ci gui noh phih mêi vâng ah mkhih u neh vâng ah hlá mah neh ami ngkhài nak ung phih kyai mêi lo neh tah khò khmang akkhak mêi noh phlèng neh a kum tä hleih úi ca kya ci.
Acun ah a kum tä hleih mêi u noh kä ngngaih na neh om ci gui ah phäh ah KChòkhò ah dí ci gui cuh mi teng shüm ko.Shingkhù gui a dí ah phäh ah a cun éi ca bung hngù k’om kkhìhlá gui ami êi vai kä om hleih yái ci gui.Mlîng kkhì,kphyùkphyài, kkhânpeh,kingkolok,mkyütmkyap ahlühlü ciah kä kkhêikevek mdek k’om gui cuh kchàng tumat noh mêi kä mhtéi ah phäh ah ashäng düt ung dídam neh shi maih ci gui. A phù kyüì ciah khùmhlâi gui cun phih kyai,a ghing ktôi shing ghing a hlühlü phih kyai,acun yîhngêi neh om ciah a hngùn kghìng gui phih kyai atäng ah ashäng didam ci gui. Aktúng pí ah shingghing kdäm gui mei noh a uih gui kilik ah akya ung kchàng gui lah a hngùn kghìng gui noh ami ók ah tui cuh ket lo khai kya ci.Kchàng cuh ashäng hta düt tûi kä ók ung phih kä ghìng hnging ciah kya ci. Acun ah kya hleih MVá ung kkhúishui om ci(ထမင်းအသက်ခုနစ်ရက်ရေအသက်တစ်မနက်). A pyéin hlü läí cuh kchàng cuh buh kä êi ah khngüp kchüih om neh gah ci.A khò ngói ät düt ung phih tûi kä o neh om neh kä gah ci ci ci.Khòmdek am tûi akdá pe pí ci cuh shingghing kdäm gui ah kya ci.
Shingghing akdäm tumat noh khò khngüp ät ung tui kâlan 50 pe ci ciah tûi ah mòòng hmat ciah hnguh hmat kchàng gui noh pyéin neh mdáng ci gui. A cun ah kya hleih vah tûilòng akdá pí cuh thûikhò ghàm hngù ah ka noh akdá pí ah lòng lo ciah kya ci. Acun ah pyéin ah phäh ah thùikhò ghíng ghàm bäng äp vai ah kä pyéin hlü ah kä kya ci. Gàmkhò yung ah phih tûi tô gui om ci. Gàmkhò yung ah phih ghàm a om ah ciah tui cuh om khai.Ghàm a maih lo ah ciah tui ket lo khai kya ci.Tui ah ngyungkhong nak ah kya ciah thùi gàm mdí ciah mêi k’ló kä om en ba vai ah kthá nak vai cuh kchò kchàng van ah màmòòng ah kya ci. Acun ah amòòng lam gui cuh hnguh hmat vai ah a ngvái gui bäng ah kä kya en hleih kyòng kkái khmó gui ung lèng neh mthêi mthàng gui vai ah kya ci.
Acun ah kya hleih kyòng ung akhmó hta gui noh ng’äì neh nglàm neh ami kâi ah kphêi ah ami hmat vai at ng’äî tumat ka guk om ci. htá läí cuh”Mêi yîk on kä nglah vai. Na ploh na úi khai.Yehbäk nei kä nglah màn.Khoh gui ploh lo khai. Shêi shêi kä ók vai.Mlùng kyä na ploh khai.Shêi shêi na ók tu ungnat nak ning koh khai”Shin ah mei mhlô ah phäh ah a hngùn kghìng gui ah yî hngêi ah shingghing,khùmhlâi a dí lo lah van ah hngùn gui ah kya ciah tui cuh van noh a mhtéi vai cuh ghunkhò uk ci gui mah ah kyòng ngthêingthàng nak,yùng hngün avan lah pâhtâ mòòng mthêimthàng nak gui ung yat hleih van no hmat neh a läk vai hlü ci. Aktúng pí ah pìgò päng ung van noh hmat neh a läk ung acun ung ka noh mânggò ghunkhò ah chüt hleih mêi ngngaih nak ah phäh ah akhòtüî pèingléng ni lo ba khai kya ci.
