Bä ciah Onesimus ah ghünlu a mong

Ng’thu k’ni ung  Polu no Philimung am ca guk ne a peit nak ung a moh am m’hle ne dong ne ng’thup ciah k’phan k’chang Onesimus no a guk vai hlü Polu no a guk peit ah kya ci. A cun ah dong ne a ng’thuh yah ung Onesimus cu Polu awn ng’bui ni ne ta a cun ung ka no Khanpughi ah mong lam gui hmat lo tu ciah kya ci. Onesimus ah a ghünlu a ng’thong hlak hnging cu Polu awn a ni ng’lak ung a pa lah a hta vai hlü ah oh hta ciah ng’kot ng’gei ng’cam nak awn a chih kon goi ah kya ci. A cun ah ca ng’lep ung Onesimus cu a m’lung k’nga a van awn a ghünlu ng’thong hlat püi ci ci ne Polu no a guk ah kya ci. Onesimus cu Polu ah phäh ah ghung htot ciah k’chang tumat ci cu ng’shing ciah kya ci. Polu no a m’lung k’nga ng’thong hlat püi ciah k’phan k’chang tumat ah kya ciah Onesimus cu Christian ng’phäi na tumat vai hlü ah do ne ng’ngaih u nak awn a imah ah om nak ah a khah ba püi ah kya ci. Thong khui k’kyong ah om ciah a ni am a gunhtot tub a vai ah Onesimus k’phan k’chang ung ka no pyhon lo ciah k’chang tumat ah a mät no phih do khai ci ne Philimon am a k’nga phlang ah kya ci.

Onesimus a mong teng ah a kya ung Antioch mânggo ung ka Ignatius no Ephesus mânggo ung om ciah yumtu ng’bum am ca guk ne a peit nak ung Onesimus cu a kya ah ghuih ne hnguh hmat k’chang tumat ah kya ciah Taigü Mâng ah kya ci ci-cu m’tam ne guk ciah kya ci. Taigü Mâng Onesimus no Polu ah guk ah ca gui m’cun nak ung gunhtot tu ne Ephesus mânggo ung pyang ba ne a yoih tuk peit ci cun phih kya hnging ciah kya ci. Pou no Corlosei mânggo ung om ciah yumtu ng’bum am ca ng’lep tumat gu ne a peit nak ung Onesimus cu Tychicus awn a täng ah a the hlak goi cun phih om ciah kya ci. Polu no ngani goi cu a kya ah yei nak goi ne ( Beloved Bothers) ci ne a chü goi man ah kya ci.