M’Cäi -ah kiüm bé-nák.
M’Cäi cã gùi lah ce ng’sä gùi-ah k’chü, ka m’dí khai-ah, ka lo ci-ah kä ’ngài- èin vä. Kä m’dí-ah, k’bé púi vai neh néi, ka lo ci. Nangmí àm, ka piéin cuh Khãnmòpí lah khaw m’dek ani maih güt chüt hleih, piéin kä bé pha phùng ung cã-ng’lung ng’mà ät, chet ät htá phih kä dí-maih düit khai.Cun-ah kia hleih, m’cäìnák gùi ung a k’zo-htá pí phih kä läk nehtah k’chàng gùi àm phih, a cun-ah ami läk tu vai-ah m’thei gùi ci cuh Khãnmòpí -ah, a ’ka pí k’bäih-ah chü vai-ah kia lo khai. A mät nawh phih bi nehtah k’chàng gùi àm phih, m’thei gùi ci cuh Khãnmòpí-ah a k’bä pí ci-ah chü-ah kia khai.
A i-ah kia hleih ci ung nami om kia cuh chü m’cäi k’süm gùi lah, Pharisee gùi-a tah kä bä tu bà ung Khãnmòpí-ah kä nami gok khai ci neh ka piéin ci. Cáü, pù pá gùi-àm, “k’Chàng kä ngáwn vai: k’chàng ngáwn ci cuh zùng im-ah, m’cha m’làng-ah kia khai,” ci neh ami m’cäì, nami ng’za tu màn ci. Kei nawh nangmi-àm ka piéin cuh, a u pang-tah a phäí-nàü gùi a ú-gen düit ung phih, ani cuh, zùng im-ah m’cha-m’làng-ah kia khai. A phäí-nàü gùi àm, nang a k’gù k’pang ci neh a sài-nák-ung phih, hluki gùi-ah mà-ah, m’cha-m’làng vai-ah chîn ci. A phäí-nàü gùi àm, a k’gù cinák ci nawh phih, m’htèi-khàw mei gah chîn ci. Cun-ah kia hleih, a-i-phih khawih-hngah vai neh ng’bum im-ah lo k’hläm nehtah na phäí-nàü gùi nawh kat tumat kù ami ning k’bün vai om hleih, a cu khaw im-’kiak-ah, na süm bà ung” na khawih-hngahnák vai cuh, nawng-èin ghütneh ng’hlat bà neh na phäí-nàu gùi na ng’gèi bà püi gùi cang vai. Cun kon-a vah, lo bà neh na khawih-hngah vai. Nang àm, kat ning k’bün ci-ah k’chàng awn, lam ung nani ng’gui ät zah ung m’lùng ng’ngaih nani ät bà vai-ah, k’sèng neh na ci vai. Kä cun-ung, Zung Báwi-am ning m’ap khai. Zung Báwi nawh thong Báwi-am, ning àp hleih, thong Báwi nawh thong-ung ning chúm lo khai. Thúng vai-ah ngùi,a pihtá phih kä k’poih eìn hleih, kä na thúng phã phùng ung kä na lut lo bà khai ci neh a k’càng-ah ka piéin ci.
Ami k’chú kä na katnák vai ci neh cáü pùghí pá gùi àm ami piéin man, nami ng’zák man ci. Kei nawh nangmi àm ka piéin cuh, kat püi hlü-ah m’lùng awn, k’hngumí teng ci phùng nawh a m’lùng àm, cun-ah k’hngumí kat püi pi ci-ah kia ci. Na k’pat mik-ùi nawh a ning m’kat hlak ung k’koih neh ghot-ä. A i-ah kia hleih ci ung käü púm-ah m’htèi khàw-ah hteh-ah k’dam, käü ng’pài tumat a dí ng’mãng tu ba khai. Na k’pat kut nawh a ning m’kat hlak ung tupit neh ghot-ä. A i-ah kia hleih ci ung käü púm-ah m’htèi-khàw-ah hteh-ah k’dam, käü ng’pài tumat a dí ng’mãng tu bà khai.
A-u nawh boh, a ’chú a nawng bà hlü ung m’chãnák-ah cã pe hlä ci-ah k’chü om man ci. Nangmi àm, ka piéin cuh a plet-ah kä kia mùi ung a k’chú nawng bà ci nawh a k’chú kat hlak-ci. Ami k’chú nawng, k’chúnák tu bà ci nawh phih ami k’chú gut ci-ah kia ci.
Kä càng láng hleih, kä ng’phiùn vai. A k’càng-ah ng’phiùnnák Khãnpù-ghí nawh hmat ci, ci-ah ami piéin, nami ng’zák tu man ci. Nangmi àm, ka piéin cuh ng’phiùn, ng’tàm vai-ah kä ng’lä vai,’ Khãnmòpí ng’mìng k’phãneh kä ng’phiùn, vai.’ A i-ah kia hleih ci ung’ Khãnpùghí-ah im-ah kia ci. Khaw m’dek phih, ng’mìng k’phãneh kä ng’phiùn vai. A i-ah kia hleih ci ung Khãnpùghí-ah khaw ng’lehnák-ah kia ci. Jerusalem phih ng’mìng k’phãneh kä ng’phiùn vai. A i-ah kia hleih ci ung bä ci-ah Sangpùghang-ah Mãng-gò-nú-ah kia ci. Na mät-ah lu-’kè ng’mìng k’phã neh kä na ng’phiùn vai. A i-ah kia hleih ci ung lu-mu tumat htá phih bók hlak, lè hlak vai cuh, nang kä na ci hnging ci. Nangmi-ah k’chü m’khá gùi cuh kia ci cuh, kia ci ci neh kä kia ci cuh kä kia ci ci vä. Cun-ah thà-ah hngá ci-ah k’chü cuh khaw-’nget ung-kah kia ci.
