Pang neh áng ci ng’làng bà hlak ci.

Cun zah ung Jesu cuh, Tyre pigò lah, Sidon pigò-a kah, ng’düi lo nehtah Decãpolis khàw hlùn neh Galilee tui-nú ah gok ci.  Cun kon-ah, a k’hngà pang neh kä chü thei ci-ah k’chàng tumat, a mà-ah lo püi u neh a’khãn-ah akut a taih vai ah ng’huinák ci gùi.  Báwi nawh cun-ah k’chàng cuh, k’chàng ng’bum gùi-ah hngù-a kah, chü neh a ng’thuh-nák ah, khah püi nehtah a k’hngà khùi ung akut-piang m’hluh neh a m’si awn m’thoh neh a m’lèi phih tók pé ci.  Cun kon-ah, Khãnmòpí k’dang neh ngük nehtah “Epheta” ci neh piéin ci. Amàwng lam cuh, “ng’làng-ä,” ci-ah piéin hleih a cun vai àm, sin-ah k’chàng-ah k’hnga kõi cuh, ng’làng lo bà neh a m’lèi phih ng’phian lo bà hleih k’chü lo bà thei ci.  Cun-ah a màwng cuh, a u àm phih kä mi m’thein èin tu vai ah m’cäi gùi ci. m’Cäi gùi láng hleih,hngá pí hleih m’thein tu gùi ci gùi.  A ng’htéi k’hmà-ah m’nai u neh, “Ani nawh a päng päng ni khai-ah bi ci. Pang ci-àm ng’zák bà hlak neh a k’áng te, k’chü bà hlak ci,” ci neh piéin ci gùi.