Antioch mânggo ung ka bä ciah Meletius ah ghünlu a mong
Christu kum 303 ung Constantine Shangpughang no Christian yum nak cu a k’cang ah yum vai kya ci ci-ne a ni ah Mâng im ung k’bäi ne a m’thein m’kan ah kya ci. A kya ah kyühkyok vai ah roma gui ah kalu nak gui ng’päng tu lang hleih phih Antioch mânggo ung ka Meletius cu yum gong ah kya ciah k’chang a k’daa no a yum ah (Arianism) cu ng’hngu ng’tuk püi ne a kya ah kak ciah ng’müi m’cha lam ung yaica nak cu k’däih ne maa nak ciah kya ci. A cun ah (Arianinsm) cu Boi Yesu ung Khanpughi ah a kya nak a ng’kyüm ah kä om ci ai-ah yum nak ah kya ci. Meletius cu Christu kum 361 ung Antioch mânggo ah Taigü Mâng ah kya lo hleih Christian yum nak m’hteng ghung ne kho kum 20 khe awng hleih a kya ah yaica ne k’tha nak ciah kya ci. A ni ah a m’lung ngaih a ng’shung hei lah hngiphngäi ciah a om k’ih gui cu ng’shä bang nak lam ung ni ciah ng’shäm ko nak ah kya lo ci. Cun tu pang ah a ni no a buiawt gui ah bi loh yai gui cu a kya ah däm ciah kya ci.
Cäicat vai lah sham ba vai ah kya ci tumat ung “ Khanpughi no a í phih kä tüi pyan pha ung a k’tük ge ah kei cu na tüi pyang ciah kya ci. ( 8:22 ) ci cu a k’tung pi ah pyein ne yumtu ng’bum khong mang ci a m’sha am a m’thei m’cäi gui vai ah a mi shan ah kya ci. A cun cu yum nak lam ung hnguh shim nak gui ung k’chü k’kyo nak ung ng’cu ng’gen nak ah kya lo ci. Laodicea mânggo ung ka George no a cun ah ng’thu cu Ariansim yum tu k’chang gui lam ah a k’phlan ah kya ci. Caesarea ung ka Acacius no phih a cun ah ng’thu k’ni a mong cu kä cang khai ah m’thei m’thang ci. A cun ah kya hleih Meletius no Boi Yesu no k’chang ah kya nak a ci tu a mong a ni hmat vai ah m’thein kan goi ne a cun ah ng’thu ni cu cang khai ah k’phlan ciah kya ci. Meletius no a cun ah cang khai ah a k’phlan ah phäh ah ngani no Meletius ah k’khan ah a kya ah m’lung k’she ni ne ta Ekaret Shangpughang Valens k’däk ne ni püi ni ne ta Armenia ah kho phung a mi got täm vai ah shang ci goi ah kya ci. Antioch mânggo ung om ciah yumtu ng’bum ung a mi yum nak gui ng’ke ne cu Christu kum 378, Shangpughang Valens a shih kon ah ng’päng ciah kya ci.
A kya ah ng’shing ciah k’chang ghüh tu nak a ng’päng cu yum nak lam ung a ng’cha ng’lang nak gui ng’päng ciah kä kya ci. A í kya hleih ci ung hlüngtai nak gui gah hlü ne a mi kya cu a cun yah ung a ng’däih ah om ba ciah kya ci. Meletius cu ng’hngu ng’tuk püi nak gui cu a k’däih buiawt ba ciah kya ci. Christu kum 381 ung Constantinoble ung a mi bi ah Christian yum nak lam ung a k’hngih vei nak a mi ng’bum nak ung Meletius cu khongmang ne pyein hlak ciah kya ci. A cun ah a mi ng’bum ng’bäi nak mät ung Meletius cu shi ciah kya ci. A ni cu
