Yùm mòòng mdángnakAkhat(1)
”Ka yùm ci”Kami yùm ci.”Mi yùm mdáng lèngnak ung”ka yùm ci”kä cung”kami yùm ci”’ciah mi pyéin ci.Mikmi cuh yùm mòòng m’än mdáng nak ung a mcäì läk neh mhtéi nak ung akcàng ah läk neh mi om ih ah akpühkkheh ah kä kphlàn pha ung yùm nak ciah kchinglung a i ah kphlàn vai mi ngshi khai kya ci.Yùm nak ci cuh a mät noh mdáng neh kchàng gui ah phäh ah amät noh amät ap neh amät on ngkhingngkhong ciah ngshinak aktúng gui ah mshàng nak shùilèi ca kchàng gui am akhâng pe gui ca Kkhânpùghí am kchàng ah mshàng nak ah kya ci.Cun ah kya hleih mi ngthêi ca gui ung ma neh cun ah shuilêi nak ah amòòng mà neh(akhat 1),Kkhânpùghí noh kcháng gui a hnguh vai a mdáng ah mòòng(akhat 2) lah akhngú ah Kkhânpùghí ah yùmnak on kchàng gui am a mshàng ba ah mòòng(akhat 3)ung mi ngthêi khai kya ci.Akhat kdäm(1)Kkhânpùghí hmat vai ah kchàng ah m’yung kthá1.Kkhânpùghí ngya hlü camlùng khngà a om nak.Kkhânpùghí ngya hlü ca mlùng cuh kchàng ah mlùng ung nggu neh om ci.A i ah kya hleih ci ung Kkhânpùghí noh kchàng cuh a mät noh a mät ka vai ah tüì khmüt neh amät täng ah kdäk neh hlò kaih ci.Kchàng ah htìnglìng nak cuh ngmüng van ah tah Kkhânpùghí on ngpòng ng’óp nak vai a na chü phòng gui ah kya ci.Kchàng cuh a ngtüî lo lah Kkhânpùghí on a nghtàngkò vai ah chü thäm ci.Kchàng cuh a ghin om ah akya ung mhngî nak on tüì khmüt neh mhngî nak on Kkhânpùghí noh mhtéimhtà ca kya ci.Avai hlü ah kchàng cuh cun ah mhngî nak kä kbäì neh tüì khmüt ca Bói ah kä gän ap ung bä càngnak ung ngkyüm bé hleih kä ghìng khai.Kchàng gui noh Kkhânpùghí ami shûi nak cuh a tuh güt chüt hleih pâhtâ yùmnak ah om ih,ami ktàigü,Missa gän àp nak,läk vai gui lah mtùmcoih ngah-tüh nak ahlü hlü on mdáng ci.Cun ah pâhtâ mòòng mdáng nak gui cuh kä ngkhôi ngcha ci gui cuh avan ung kchàng pakkhúi päng ung hnguh shàn ah kya neh kchàng cuh pâhtâ on om ca a hngùn kghìng ah pyéin ah kya ci.Bòi cuh kchàng tumat ung ka noh kchàng van tüì khmüt neh khòmdek ah kkhân ah om ci.Bói cuh kchàng gui ah om nak akhing lah ngdü hngün gui phih mkhôi mcha ci.Cun cuh ani shùilèi neh hnguh vai phäh ah kya ci.Akcàng ah ani cuh mikmi tumat htî on hla neh om ca kä kya ci.A i ah kya hleih ci ung mikmi cuh ani ung ghìng om neh hngün thô hteit htôn neh mi om ca kya ci.
