Tui k’phùm Johan ami ngáwn-ah màwng.  

Jesu a ng’ming tháng lo hleih Herod Sangpùghang nawh ng’za-lo neh, “Tui k’phùm Johan, si-ci gùi-ung-kah ghing bà pi ci. Cun-ah kia hleih ã m’dáng ci,” ci neh piéin ci. A m’sah nawh ani cuh, Elijah ah kia ci, a m’sah nawh phih, ce ng’sä gùi-ung-kah tumat kù a tah kia ci,” ci ci gùi. Cun-ah màwng cuh, Herod nawh ng’za-neh, “A k’hngü ka tuk pit-ah Tui k’phùm Johan-ah kia ci. Sin-ah k’chàng cuh, sih ci gùi ung-kah ghing lo bà pi ci,” ci ci.

Sangpùghang Herod nawh a nàü Philippu-ah k’chú, Herodia cuh, gut neh om tu bà püi nehtah Tui k’phùm Johan cuh, pha hlak gùi neh thong ung a chúm hlak gùi.   A i-ah kia hleih ci ung Tui k’phùm Johan nawh na nàü-ah k’chú na guh vai-ah kä kia ci, ci neh Herod àm piéin te ci.  Cun-ah kia-hleih Herodia nawh Tui k’phùm Johan cuh, ú neh ngáwn hlü ci.      Cun tu pang-ah phih, Tui k’phùm Johan, k’chàng k’ní-ah a kia cuh, hmat neh Herod nawh m’htéi hleih kä ci hlot ci. Herod nawh Tui k’phùm Johan cuh, kiüh-à neh a piéin phung ng’za nehtah a i a ci vai kä hmat bà ci. A cun-ung phih, ani cuh, ng’ngài èi man ci.

Cun kon-ah, Herod nawh a mät ami htánák-ah k’hngüp ung Galilee khàw ung a ng’vái gùi chü gùi neh a m’ei m’áwk tu gùi zah ung,  Herodia-ah htá k’hngumihtá cuh, lo neh ng’lam hleih Herod lah a k’chin gùi cuh, zèi tu ci gùi. Cun kon-ah, Sàngpù-ghang nawh k’hngumihtá àm, “Na ng’zák hlü nà san vai, kei ka ning pe khai” ci neh cun-ah k’hngumihtá àm piéin ci. Na san phung cuh, ka khàw a m’cot-ah chüt hleih ka ning pe khai ci-ah ng’phiùn mah mah neh piéin ci. K’Hngumihtá nawh a nú ah hteit neh “A i ka san vai ang? ci neh ng’si hleih “Tui k’phùm Johan-ah lu-’kè sàng-ä”a ci.  A k’tén-ah dáwng bà neh Sangpùghang àm, “Sin-ah dàwn ung Tui k’phùm Johan-ah lu ’kè m’chäp neh nà na péit vai ka ng’za-hlü ci,” ci neh m’sàng bà ci.  Sangpùghang cuh, a kia-ah thüi tu láng neh a ng’phiùn te-a phäh-ah lah, a ’chin gùi a kiüh à gùi hlu-ah, kä dám hlü neh,  “Tui k’phùm Johan-ah lu-’kè lo püi-ä,” ci neh a phàn-ah k’chàng tumat tüi hleih a cun nawh thong-ah hteit neh Tui k’phùm Johan-ah lu-’kè tu pit ci.  Tui k’phùm Johan-ah lu-’kè cuh, dàwn ung m’chäp neh k’hngumihtá àm pe hleih k’hngumihtá nawh phih a nú àm thak ci.  Tui k’phùm Johan-ah k’chàng gùi nawh phih, cun-ah màwng cuh, ng’zák u nehtah lo neh a gáwk hteh bà püi neh k’phuh ci gùi.