Bä ciah Paul miki lah a ng’toi püi gui ah ghinlu gui a mong
Japan ghunkhaw ah maapi k’bäih ne cang lam ah phäh ah a hngun pe ciah bä ciah Paul Miki cu Christu kum 1564, ung Kyoto mânggo ung ng’tüi ciah kya ci. A k’hmo yah ge ung Jesuit Boiphaya ng’htoi ung lut tu ne, ng’thu k’ni aunghtang khai ah thähla m’thei m’thang hnging ciah kya ci. Japan ghunkhaw ah khokum 50 ng’dawt ne yumtu k’bum ng’ yung pi ciah kya hleih, yum hei gui phih 2 milillon om püi ciah kya ci. Christu kum 1588 ung mang ciah shanpughang no a mät va khanpughü ah kya ciah pyein ne Christian Taigü gui ni, Khanpughü ah mong lam bi ci gui a van cha k’chuk ah lung ung a mi khaw ah a mi hteh ba vai ah pyein hleih a k’daa no ng’ngai ne a mi kho ah hteit ba ci gui ah kya ci. Koyin Paul Miki lah a hei a teihpüi gui cu kä hteih ein tu ba ne ng’thup ne k’poih ghüt ci gui ah kya ci. Christu kum 1597 ung Koyin Paul Miki lah a teihpüi gui 25 cu ga k’kâp gui no a mi pha ah kya ci.
Nagasaki mânggo ung a mi gok vai a phäh ah mânggo gui a k’daa phlän ne ne khah püi gui ne ta lam ah a mi khahpüi gui nak pum ung a mi hngakoi gui aahpit peit gui ne m’lep m’hle gui ne a mi ci gui ah kya ci. A mi van shing m’khang k’tung khan ah taih gui ne a mi chih gui ne a mi hngügon gui cun phih m’shi k’hngü pat awn a mi pat peit gui ah kya ci. A cun ah ci tu gui lang hleih phih ngami ah kä kyü ein ne a mi yum nak khäng hleih a mi ling gai hnguh ci gui cäicat ci gui ah kya ci. Paul Miki ah a po gui cu Salan ng’äi m’cu u ne “ ka mi hngun gui cu nang Boi am ka mi ning gänap ci ne ci ne leng leng ba ne m’cu ci gui ah kya ci. Bä ciah Paul Miki cu bä ciah shing m’khang k’tung ah khan ah ka no a pyein cu “Kei cu Japan ghunkhaw ung ng’tüi ne, Jesuit Boiphaya ng’htoi ung ka luh vai ah Khanpughü no na chü ci ci-ne pyein ciah kya ci.
Boi Jesu ah ng’thu k’ni a cang ah phäh ah cang lam ung ka hngun ka pe khai ah kya ci. Shanpughang ung ka no leng ne kei ah hngun m’dii k’hmaih hlü ci gui ah kat nak gui a van ka m’gein ci. Ngami gui a van m’shi nak Sacramentu khan tu u ne Christian ah a mi kyat u yop vai ah ka shang ci” ci ne pyein ciah kya ci. K’chang ngon ci gui k’phli no a mi k’khim gui phong ne a shäng hta düt awn a van a mi ngon yop ah kya ci. Yesu, Maria ah ng’huipa nak ah k’’taigü nak a ng’däih ah m’cu u ne a mi hngagang cu dìmkyäp hta ciah hnguh gui ah kya u ne a mi hngun pit ciah kya ci. Nga mi gui a van cu Christu kum 1862 ung bä ciah k’chang ah kya lo ci gui.
