Yeisu Bawi Noh Ng’thu K’ni Cuh M’thei M’thang Ci

“A K’hmo hta gui cuh kei-ah lo hlak gui vä. Kä cho-ein vä. I kia hleih ci-ung Khanmopi ghui ghun kho cuh nga mi-ah hlo-ah k’chang gui-ah kho-ah kia ci.” (Mt  19:24)

Yeisu Bawi noh K’chang gui-am Khanmopi ghui ghun kho-ah mong cuh m’thei gui ci. A ni noh k’chang gui-ah k’khan-ah Khanpughü noh am’hngi nak nak-an ng’pak hleih ng’thu k’ni cuh m’thein gui ci. Khanpughü noh ahta k’hngu hta k’pa gui cuh ami yei kyai vai ng’ya hlü ci.

            K’chang gui cuh yeisu Bawi-ah m’thei m’cäi gui ng’ya tu u neh yei kiai ci gui. Ngami gui ch Khanpughü-ah om nak lam m’shüm tu gui khai-ah k’chang tumat cuh güng kio ti ci gui. Yeisu Khanpughü noh k’chang gui noh i hlo k’cha k’taigü vai, k’chang gui tumat lah tumat i hlo k’cha m’hngi tu ng’kyu vai gui cuh m’thei m’thang tu gui ci.

           Yeisu Bawi noh Khanpughü-ah om nak-ah gok tu nak vai cuh lam na m’shüm gui ci. Khanpughü-ah om nak cuh Khanmopoi-ah ghui ghun kho-ah kia ci. Khanpughü noh ani-ah hta k’hngu hta k’pa gui-awn atäng-ah Khanmopi-ah om hlü ci.

A hlu läk ng’shä gui cuh Bawi-awn atäng-ah mango tumat-ung ka noh mango tumat-ah hteit tu ci gui. Bawi-ah m’thei m’cäi gui cun phih ng’ngai tu cheng geng ci gui. Kho m’dek khan-ah Bawi Khanpughü-awn atäng-ah ami om yah-ung abi loh gui, am’thei m’cäi gui man cuh guk then neh htin ci gui. Cun gui cuh ng’thu k’theing-ung guk neh tän k’chei-ah kia ci.

 Mikmi gui noh phih Bawi Yeisu-ah ng’thu k’ni gui cuh ng’thu k’theing (ca cüm)-ung mi hnguh tu hnging ci. Ng’thu k’theing cuh kho m’dek khan-ah Bawi Yeisu-ah m’thei m’thang gui, abi loh gui-an mong gui cuh gu then neh ami m’shei-ah ca uk-ah kia ci. A shin-ung kia tu k’cang ci gui lah k’taigü nak gui, ng’äi gui lah Bawi-ah ng’thu gui-awn be neh om ci.