Bä ciah Bathild ah ghün lu a mòng

Christu kum 630 ung Pinle tamya ci-ah k’chang ah khoh tang gut ne kya ciah k’chang a  m’shah cu Bathild ci ne ng’ming na ciah English k’chang k’hngumi hta pha ne khah püi u ne ta pyinhtit kho ah tui lam awn hteit khai ah htinpow tumat ung a mi khah püi ah kya ci. A cun ah k’chang gui cu Neustria ung om ciah Shanpughang ah Nando ung ngui gui m’htei ne om ciah a ng’vai tumat am a cun ah k’hngumi hta cu a mi yoih ah kya ci. Bathil cu a cun ah a om nak ung a k’ni ah a í phih bi lo m’htei m’hta ne a düm hta ah om ciah kya ci. Shangpughang Clovis II a k’hngih nak no Bathild ah a müihla lah a m’lung k’nga a kyom htang nak cu hngu lo ne Christu kum 649 ung letthat ne a om püi ah kya ci. Shangpughang cu shih hleih Bathil lah a hta gui cu Pyinhtit kho a pi hta bäng uk ne om ba ci gui ah kya ci. A mät no a buiawt man ah kya ciah k’phan k’chang yoih a mong m’dí k’hmaih nak vai ung a kya ah nglung lak na ne k’phan k’chang ah a mi yoih vai ah a mi ci gui a van m’hlot ba gui ciah kya ci.

Shangpi nu Bathild ah k’chang gui ah k’khan ah a pyein hlak a bi loh hnging gui cu yum nak lam bi loh nak gui ung ng’hloi ne gunghtot nak ah kya lo ci. Mamah kyawng gui lah Boiphaya ah kya lo tu khai gui ca a mi ng’thei ng’thang nak vai ah kyawn gui coh pe gui ciah kya ci. A k’hnguh ah a ni ah a ming thang nak lah a ng’büh nak gui nong yop ne Mamah kyawng ah lut tu ne läkalm gui awn k’taigü ne om ciah kya ci. Mamah Bathild ci a hei Mamah gui awn kä täng ein hleih a m’lung m’yo m’nem ne, a ni ah a ng’vai ah pyein a í phih a k’ni hta ah ng’ngai ne om ciah kya ci. Mamah kyawng ah a om yah ung goi pyam ci gui lah duyai k’chang gui a k’ni ah m’htei ne om ciah kya ci. A ni cu Christu kum 680, January k’cha 30 ung shih ciah kya ci.