Bä ciah Gildas ah ghünlu a mòng

Bä ciah Gildas cu Britain Pakkhui k’chang tumat ah kya ne Christu kum .. ung ng’tüi ciah kya ci. A ni cu Christian k’chang gui ah m’hteng ciah läklam ah kya ciah mät no mät kyünhloi nak cu a k’ni ah läk ciah kya ci. A ni cu Wales kho ung dong ne Yahteih tumat ah kya lo ci. Hngün a shäng hta düt ung hteit hton ne Khanpughi ah mong lam gui m’thei m’kan ne om man ciah kya ci. Christu kum 541 ung Gildas cu a ni ah a ming thang pi k’bäih ciah De Excidiis Britanniae cu guk ciah kya ci. A cun ah a guk nak ah ca uk ung Britain kho mang k’chang gui lah Taigü Boi cu Christian ghünlu awn ng’awi ciah thei bang tu hlü vai ah ghünlu lah läklam gui a mong a k’ni ah phupit vai gui bi vai hlü ci ci-cu ng’shing khai ah a guk ah kya ci. Ng’thu k’pyhüm ung k’kce ng’shä gui no m’dang ne a mi pyein ah hlo ah ngami gui ah ng’cu ng’vah nak gui cu a mi mät ah kat nak ah phäh ah kya ci ci-ne yaica buit awt ci gui am  m’thei m’cäi ci gui ah kya ci.

Ngami gui ah m’lung k’nga a dídam cu Angelo-Sexon ci-ah ngami gui ah om nak ah hteit ne aung tang ci gui ah phäh ah kya ci. Bä ciah Gildas cu 16 century ung Britain k’chang gui am ng’thu k’ni ung om ciah a kya ah m’shuuk chaak nak ah ng’thu k’ni a mong pai awn ngami gui ah a mi m’lung m’cha cu k’phlang gui ciah kya ci. Bä ciah Gildas cu ng’thu k’ni, Virgi lah Ignatius ah mong gui cu a k’ni ah hnguh hmat ci ci-cu a ni no a guk nak ah ca uk gui ung ng’dang ciah kya ci. A mät no a kya ah a k’tha nak cu k’chang gui ah yum nak a khan nak lah a mi m’lung a thähla nak ah kya lo ci.