M’Sí k’phú awn, a m’tu m’tängnák.
Cun kon-ah, tui nú pèi-ah lèng neh m’thei bà mä ci. k’Chàng gùi a kia-ah dá ci gùi. Jesu cuh, ng’hlè-’kõ ’khãn-ah ngoh hleih k’chàng gùi cuh, tui-’kam, m’dek ’khãn-ah om ci gùi. Cun kon-ah m’tu m’tängnák a k’dá-awn m’thei gùi neh ngami a m’cäi lo gùi cuh, “ng’ngài vä, m’sí k’phú cuh, m’sí phú vai neh hteit ci. A phú zah ung a m’sah cuh, lam ung ng’kia hleih k’phiú ’kha gùi lo neh èi ci gùi. A m’sah cuh, m’dek ng’pám ci-ah, lung- k’chóng hngù-ah ng’kia hleih a k’tén-ah lut lo láng neh m’dek kä thúk ci-ah a kianák awn, Khaw-hngi nawh a hlo-ah kia neh a pià kä khäng hleih ng’zài neh ket ci. A m’sah cuh, ng’hlìng hngù-ah ng’kia hleih ng’hlìng gùi lut lo neh k’düi u hleih kä vui pài ci. A m’sah läí cuh, m’dek k’ní ung ng’kia neh a k’ní ah vui pài neh thùmkip vei, k’chukkip vei, phia vei hngá neh ng’hlèp ci. A ng’záknák vai-ah a k’hngà om ci nawh ng’zák-hlä,” ci ci.
A mät htá a om zah-ung, a-hlu-läk gha-leigoi-awn om tu ät ci-ah k’chàng gùi nawh sin-ah m’tu-m’tängnák awn a i a piéin hlü-ah màwng ng’si ci gùi. Cun kon-ah, ngami àm piéin lo neh “Khãnpùghí-ah khàw, thúk ci-ah màwng cuh, nangmi nawh nami hmat tu hnging ci. k’Chàng hei gùi läí cuh, k’pùng na gùi neh m’tu m’tängnák gùi awn piéin-ah kia ci. Hnguh láng neh kä k’síng khai gùi, ng’zák-láng neh kä hmat khai gùi-ah kia ci. Ami m’lung ng’ngaih ng’lat bà hleih kat-ung-kah ami phión vai-ah ng’ä ci gùi.
Ngami-àm piéin lo neh “Sin-ah m’tu m’tängnák kä nami hmat ci ang? Cun-ah kia ung a hei m’tu m’tängnák a i-ho chà-ah nami hmat khai ang? M’Sí phú ci nawh, Khãnpùghí-ah ng’thu m’sí phú ci. Lam-’khãn-ah ng’kiak ci gùi cuh, sin gùi néi. Ng’Thu cuh, ng’za neh dàw u hleih khaw-’nget nawh lo neh a k’tén-ah ami m’lung-’kiong-ah phú-ah ng’thu m’sí cuh, la zop ci. A- cun-a hlo bä-ah lung-ah dá nák ung ng’kiak ci-ah m’sí cun phih, sin gùi-ah kia ci. Ngami nawh ng’thu ng’zák u neh a k’tén-ah zèi neh dàw láng u neh phih, ng’zung kä htek hleih a säng htá-ah kia ci. Ng’Thu-ah phäh-ah, thüi-hlèi zái-cãnák a om lo ung a k’tén-ah ami m’lung kiü’ci. Ng’Hlìng li-ah phú-ah m’sí om bà ci. Sin gùi cuh, ng’thu ng’zák ci gùi-ah kia ci. Cun tu pang-ah phih, khaw m’dek-’khãn k’om gùi-ah phäh-ah cäi ng’änák, khawh-tang-ah m’hlènák, a hei hei gùi ng’zák hlü-ah m’lung om lo neh ng’thu cuh, khíp kilik u hleih kä vui-pài kä ng’theih neh kia ci. Ng’Lei k’ní ung ng’kiak ci-ah, m’sí ng’mà cuh, sin gùi-ah kia ci. Ng’Thu cuh, ng’za neh a m’sah a khùi thùmkip, m’sah a khùi k’chukkip, m’sah a khùi phia-ah ng’hlèp ci.
