Bä ciah Angela Merici ah ghünlu a mòng

Bä ciah Ursula ng’bum ng’düih ciah Bä ciah Angela Merici cu Italy ghunkho, Densenzano mângggo ung Christu kum 1470 ung ng’tüi ciah kya ci. A ni cu a k’hmo hta yah ge ung hmei hta ah kya ci. A kho kum 13 ung shih ciah a pai ung ka no Khanmopi lam m’dang nak gah ne Khanpughi ah ni bä nak a shüm hmat ba nak ah a mät no a mät Khanpughi am gänap ne Franciasan ng’htoi un glut tu ciah kya ci. M’dang na tumat ung Khanpughi no a ni am a k’hmo gui ah hnguh shoim nak gui lam ung a m’hlüng m’tai nak vai ah a ng’bum tumat m’düih hnging khai ci cu m’dang ciah kya ci. Densenzano mângggo ung k’hngumi hta gui a m’thei m’thang vai ah kyawng tumat k’hmong ne a k’hngih nak kyawng cu Brescia mânggo ung k’hmong ciah kya ci. A cun ah kyawng ung k’hngumi hta gui a k’tung pi ah dudong paca ci gui ah k’hngumi hta gui 12 cu k’bum hnging ciah kya ci.

Ngami gui cu ca a mi ng’thei yah lah a mi k’taigü yah ung ng’bum ne om tu lang pang u ne phih mamah gui no a mi ng’thuh ah htinkan gui hlui ne mamah gui no a mi cu ah taigü nak gui kä m’cu ne om ci gui ah kya ci. Christu kum 1535 ung a teihpüi gui a pi hta no tekahto kyawng gui ghung m’htei ciah bä ciah Ursula ah ghung m’htei nak ah k’kaa ah om ciah a ng’bum ah kya lo ciah kya ci. Yumtu ng’bum ung maapi k’bäih ne ca m’thei ci gui ah ng’htoi ah kya lo ci. Bä ciah Angela Merici cu Christu kum 1540 ung shi ne Christu kum 1907 ung bä ciah k’chang ah kya lo ci.