Jesu noh kho nget k’thäm ci.
Jerusalem ung-kah kium lo bà ci-ah k’chü m’cäi k’süm gùi nawh phih, “Beelzebul nawh omnak ci. Khaw-’nget gùi ah Sangpùghang äp neh khaw-’nget gùi k’täm ci,” ci ci gùi. Jesu nawh ngami cuh, a pèi-ah chü gùi neh, m’tu m’täng neh ngami-àm a piéin lo cuh, “Khàw-’nget nawh khàw-’nget cuh, a i-ho cha-ah k’täm hnging khai ang? Ghun khàw nawh a mät ghun khàw ng’näng-kan püi neh a ng’pài ung cun-ah ghun-khàw cuh, kä ng’düng hlot khai. Im nawh a mät im ng’näng-kan püi neh a ng’pài ung cun-ah im cuh, kä ng’düng hlot khai. Khaw-’nget cun phih, a mät ng’näng-kan püi neh a ng’pài-ung, kä ng’düng neh maih khai. Gáipí k’bäih ci, mà neh chit neh kä k’pón-ung, a u phih im-’kiong-ah lut neh khawh-tang kä gut hnging khai. A k’gáipí chit neh k’pón kon-avah, a im ung om ci-ah khawh-tang cuh, gut hnging vai.
Nangmí àm a k’càng-ah ka piéin cuh, k’chàng gùi-ah kat a kíü-kíü lah Khãnpùghí ng’ming k’pha neh katnák-ah k’chü, phión-ah kia khai. Cun-ung phih Htí-théing ci-ah Muh Khãnpùghí ng’ming k’pha neh katnák-ah k’chü, k’chü ci cuh, a i-zah ung phih kä phiòng hnging khai. A cun-ah ci ah a k’cùm a ng’täih-ah dí dam khai. “A i-ah kia hleih ci ung, ani ung ng’hloh-hngóm ci-ah, khaw-nget om ci,” ci ci gùi.
