Bä ciah Vincent ah ghünlu a mong
Spain ghunkho ung maapi k’bäih ne bä ciah k’chang ah kya lo ciah Bä ciah Vincent cu Spain ghunkho, Huesca mânggo ung ng’tüi ciah kya ci. A ni cu Saragossa Taigü kho ung Taigü khem (Deacon) tumat ah kya ci. Christu kum 304 ung Shangpughang Diocletian no k’chang gui a kya ah a kalu nak yah ah kya ne Bä ciah Vincent lah a ni ah Taigü Mâng Valius cu ung thong a mi chum goi u ne kalu na goi u hleih a kya ah yaica ne ei ah coi tui ah gha ne yai ci goi ah kya ci. A mi m’kyüih m’kyok gui, a mi k’däk goi gui a van a í ah kä ng’ngai ci ci-lah ngani ah yum nak ah phäh ah a van khan hnging vai a ge ah ka om ci ci-ne ne Bä ciah Vincent no hlukyi ah shä hleih a cun ng’yak ciah Shangpughang cu a kya ah m’lung k’she ne a hlü hlü ah a kalu nak ah kya ci.
A ni a mi chum nak ah k’kyong ah om ciah gä ung taih ne a hla gui m’shi kolok awn a m’hta gui ah ng’kya lo khai ah a mi kaih peit ah kya ci. Cun kon ah a hla gui m’shi awn hluk ne mei a kya ah hlen ne cak ciah m’shi ah k’khan ah a mi ng’shaih ah kya ci. A k’hngu ah payak yop ciah k’am pi gui be khai ah a mi tha nak ah k’kyong ah a mi m’shän ah kya ci. A cun ah a mi tha nak ah k’kyong ah Bä ciah Vincent cu shi ciah kya ci. A cun ah a hlü hlü ah a mi kalu nak gui a dìm kyäp hta ah a khan hngu ciah thong m’kot tumat cu a kya ah cäicat ne a mät ah kat nak gui ah phäh ah ng’yu ng’yon ba ne ta a k’ni lam ah a m’lung k’nga ng’thong hlat ciah kya ci. Bä ciah Vincent ah a gok cu ng’ip ung ghon u ne ta tui ung a mi m’hteh te Christian k’chang gui no shui na ne a mi hnguh ba ah kya ci. A cun ung ka no Bä ciah Vincent a mi yum m’nai nak gui cu yumtu ng’bum ung yat lo ciah kya ci.
