Papa Shangpughang ah ng’thu

Papa Shangpughang Leo no Christian k’chang gui am a k’cum ah ng’ngaih na ne om vai, a k’tung pi gui ah bi vai, hmat vai ah hlü ci gui hmat ne bi hnging vai ah ng’ngaih nak vai lah mimi gui cu Khanpughi ah mik ung a í hlok ah a phu mi om ci ci-cu a ngoi a phih kä mi k’hmih ein vai ci-ne pyein ci. Mi mi gui na m’hngi gui ciah a shün a k’däih ah ghüng om ciah Khanpughi mi hnguh hnging vai ah a k’hngüptäi k’taigü ne ng’ngahtüh vai hlü ci. Tuik’phùm Yohan no Boi Yesu cu k’pyhon ciah Boi ah kya ci ci-cu m’khän ne pyein ne Israel pakkhui k’chang gui am Boi Yesu ah Khanpughi ah a kya nak lah a ni ah bi loh gui ah Mission cu m’thei m’kan gui ciah kya ci. cun Kon ah a bi loh vai gui a van ng’pyi ng’päng khai ah a bi loh kon ah kei ah hngu ah Boi Yesu cu lo ne a ni cu hlüngtai tu pi ci ci-ne pyein ciah kya ci. Tui k’phum Johan cu k’chang a k’daa no a m’nai tu ah k’chang bä tu mat ah kya ne Jerusalem ung om ci gui ah aa-naa k’shüm ghun kho mang gui hngno noh a mi kyüh aa tu ah k’chang tumat ah kya ci.

Cun tu pang ah phih a ni ah aung tang nak lah k’chang gui a k’daa no a mi yum nai nak düt awn kä yeikyai ein ne Boi Yesu ah hlüngtai nak m’tam ne a ngoh nak a peit ah kya ci. Yohan cu Khanpughi ah lam pyang khai ah maa ne a mi tüih lo ah kya ci ci-cu a hmat ah hlo ah Boi a lo ung yeikyai nak lah m’lung m’yo nem nak Khanpughi ah maa ah Boi a om cu shüm hmat ne ng’non pe ciah kya ci. Yeikyai nak lah hlüngtai nak cu aungtang nak lah ng’ming thang nak ah kä kya ci. Mi mi gui ah Khanpughi no na m’hngi gui ne na ng’ya gui hlü ci ci ung ng’hlüh ciah kya ci. Boi Yesu no a pyein ah m’hngi nak cu tuhgüt chüt mi mi gui ah ng’lak ah om ciah Khanpughia ah m’hngi nak ah kya ne mi mi gui ah k’tha na ne mi bi gui na ng’pai tu pe gui ne mi mi gui ah ghüh hleih mi phüih gui na a ni am mi thak vai ah kya ci. Khanpughi awn mi ng’hnguh hnging vai ah phäh ah Boi awn a täng ah hlalai ah hläih vai ci ne Papa Shanpughang no pyein ci.