Bä ciah Canute ah ghünlu a mòng
Bä ciah Canute cu Christu kum 1042 ung ng’tüi ciah kya ci. Christu kum 1081 ung Canute cu Denmark shangpughang ah kya lo ci. Denmark k’pakkhui k’chang gui ah k’daa cu English gui ah Khanpughi ah mong lam thähla m’thei m’thang na ah phäh ah Christian k’chang ah kya lo ci gui ah kya ci. Shangpughang Canute cu Adela ci-ah k’hngumi hta k’chu na ne Charles lah Cecilia ci-ah a k’nga ng’gum ah hta ci goi ah kya ci. Canute cu a bü ceng däm ciah shangpughang tumat ah kya ne ta yum nak lam ung k’tha na ne k’taigü ne om ciah k’chang ci-cu m’dang ciah kya ci. Phaya kyawng ah aa-naa gui m’hlüng m’tai ciah kya ci. Lund Cathedrel lah Lund Cathedral kyawng cun phih m’düih ciah kya ci. Lund ung om ciah Boiphaya kyawng gui no kho m’dek gui m’däm ne gah lo tu k’khai gui ah ci hnging ciah kya ci.
Shangpughang Canute cu cu a mät ah ghunkho ung taga ciah läklam gui lah ngui ghui awn a gunhtot nak awn yumtu ng’bum k’tha a k’thai ah pe ba ciah kya ci. Ghunkho mong lam ung a ni ah phukpit nak ah mong gui kä cang lah Engaland kho ah lukyüm a guh vai ah a k’tha nak no a ni ah hlüntai nak ung ka no a kyak vai lam m’shüm ciah kya ci. Denmark Pakkhui k’chang gui cu yum nak lam ung a mi bü ceng gui ah a phäh ah k’phlam loh a mong gui cu kä k’bäi ne Canute cu a mi ng’hngu ng’tuk püi ah kya ci. Canute a k’taigü nak ah Phaya kyawng ah a k’pung ah ka no k’chang a k’daa a kya ah m’lung k’she ne ng’bum ci gui ah kya ci. Christu kum 1086, July k’cha 10 ung Boi Yesu ah a shihla ei ok ne m’khuk khu dong ne a k’taigü yah ung k’chang tumat no phaya kyawng m’kot ung ka no k’htei awn shun hleih Denmark Shangpughang cu shi ciah kya ci. A ni cu Christu kum 1101 ung Denmark ghunkho ghung m’htei ciah bä ciah k’chang tumat ah kya lo ci.
