Egypt kho ah ka Bä ciah Anthony ah ghinlu a mong
Hlalai ma ah Yahteih ng’htoi m’düih ciah Anthony cu Christu kum 251 ung Egypt khaw ah ng’ tüi ciah kya ci. A nu lah a pa a ni shih kon ah Bä ciah Anthony cu nga mi ah a mi khoh tang gui ah kya ciah im, lai, ng’cham gui a van cu a be am m’htei ne a bi vai ah a peit ah kya ci. Bä ciah Anthony cu a kho kum m’ku 20 a lo yah ung Missa gän ap nak tumat ung a mi k’chei ah ng’thu ni ah kya ciah Mt: 19:21 ung “ Nang cu na ng’kyüm be hlü ung, na khoh htang gui yoi neta dudoong ci gui am pe gui ä. K’khanmopi khoh na gah khai. Cun kon ah ka hlu ah na na läk vai” ci ah ng’thu k’ni a ng’yak cu a ni ah m’lung kyong ah om kheng geng ciah kya ci. A cun ah kya hleih Bä ciah Anthony cu a ni ung hlü ciah khoh tang gui bäng la neta k’boih ba ciah a khoh tang gui a van yoi ne duyai ne pyam ci gui peta ne gunhtot gui ciah kya ci. A cun ung ka noh Mt: 6:31 ung “ Cun ah kya hleih a i ei vai, a i ok vai , ci ne kä ng’äcäi ein vä” ci ah ng’thu k’ni cu ng’ yak lo ba ne k’poih ba ci ah a khoh tang gui a van k’chang gui am pe ba gui neta, a be hta cu Marmah ng’htoi ung luh tu hlak ne ta, a mät cu hlalai ah htei Yahteih ah kya lo ciah kya ci. A cun ah Yahteih ah a kya lo ung ka noh tün ne A k’sheitkaa (khawnget) noh a hlü hlü ah toktap tu lang hleih phih bä ciah Anthony cu a ni ah k’taigü nak lah kyünhloi nak awn A k’sheitkaa ah toktap nak gui cu m’chüt näng ciah kya ci.
K’changui gui a k’daa noh bä ciah Anthony am ng’mü m’cha lam ung a k’nga k’phlang tu gui vai ah pyein u hleih a cun ah a ci peit nak gui awn a ni ah hlu läk ci gui ah k’cahng gui cu daa lo pihti ciah kya ci. A cun ah kya hleih a ni cu a hlüläk k’chang gui a van awn ät ne Christian Yahteih ng’htoi cu leng ne m’düih hnging ciah kya ci. A ni noh a hlüläk k’chang gui am a pein cu “ khawngoi lam ah a kya ung mü ah shih lo khai ah k’chang vai hlü ah kya vai, mü hngün täng ah a kya ung a ngong khawngoi kä hnguh tu ba hlot khai ah k’chang vai hlü ah mät noh mät ng’ngai ne (bi loh, ng’ngahtüh nak gui ung a i phih a ni pi ah ng’ngahtüh -bi lo ne m’lung k’nga kyomhtang khai ah pyan vai hlü ci ci-ne m’cäi m’ä gui ciah kya ci. Christu kum 355 ung a teihpüi tumat ah kya ciah St. Athanasius ah chüthäm nak awn Alexandria maanggo ung hteit ne Boi Yesu cu Khanpughü ah kä kya ci ci cu kä cang ciah kya ci ne m’hteng ne Yesu cu a k’cang ah Khanpughü ah kya ci cicu m’thei m’thang ne k’chang a daa yum nak ung a käng htek lo pi hti vai ah ng’ mü m’cha lam ung a k’ni ah chü-kong gui ciah kya ci.
A ni cu kä shih pha ung a hluläk k’chang k’hngih chü goi ne a ni a shi ah a kya ung diim kyäp hta kiah m’tung ung a mi k’phuh vai ah m’cäi goi güt ciah kya ci. Bä ciah Anthony cu Lai bi ci gui lah im ung a mi vuh m’htah ah ui, ai, vok, me gui ghnung m’htei gui ciah bä ciah k’chang tu mat ah kya ci.
