Bä ciah Honoratus ah ghünlu a mòng
Bä ciah Honoratus cu Christu kum 350 ung Gaul (Modern France) ung ghunkho mang gui ka vai ah bi bi ciah k’kyawng khui ung ka no ng’tüi lo ciah kya ci. A hmo k’chang tumat ah kya ne yumgong ah kya ciah kho gup gui m’shuukchuk nak gui nong ne Christian tumat ah kya lo tu ne a phäi Vanantus cun phih Christian gok tu khai ah chü tu ba hnging ciah kya ci. A ni cu a phäi Vanantius awn a täng ah Greek ah ng’phlon ne a mät hta om ne läklam gui awn k’taigü ne om ciah Yahteih ah ghünlu awn k’tha na ne om ciah kya ci. Carprasius ng’ming na ciah k’chang tumat ah lam m’shüm nak awn Palestine, Syria lah Eygpt kho gui ah kya ciah htitheing ciah hngün gui lah Taigü Boi gui ah om nak ah kyawng gui ung hteit hton ne k’taigü man ciah kya ci. A cun ung ka no Taigü Boi Frehus ah k’tha peit nak awn Provence tuik’kam ung om ciah bungu lah k’pya ng’tang ung om ciah kya ci.
AD 400 ung a ni cu Lerins ci-ah Taigü gui ah om nak ah kyawng tumat m’düih ne a k’hngu ah Taigü Boi gui ah kya ciah Troyes mânggo ung ka Lupus, Lyon mânggo ung ka Eucherius lah Arles mânggo ung ka Hilary ni lah a hngu läk ci gui a k’daa cu chüthäm hnging ciah kya ci. Lerins Abbey cu St. Pachomius ah a kya ah m’hteng ciah läklam gui ah phäh ah a kya ah a ming thang ciah ng’thei ng’thang nak lah ng’müi m’cha lam ng’phät nak vai ah a k’tung pi ah kya lo ci. Ireland ghung m’htei ciah Bä ciah Patrick cu a cun ung hnguh shim nak ah pinnya ng’thei man ciah kya ci. Christuu kum 426 ung Honoratus cu a mät no a mät kä chin ci-ah ngai ne dam tu lang pang hlei phih Taigü Mâng ah kya lo khai ah ghü ne a mi k’hmoh ah kya ci. Taigü Mâng ah kya lo ne Cathokic läklam gui a k’ni ah pyangtham ba ne Arian läklam gui ng’hngu ng’tuk püi ne bi bi ciah kya ci.
A cun ung ka no kho kum a pi sho lo hleih Christu kum 429 ung a ni no k’tha na ne a bi ah Taigü Boi gui ah läklam gui lah Khanpughi ah mong lam gui bi loh a bi loh nak gui awn a kya ah bongbai lo ciah kya ci. Taigü Mâng Honoratus ah hngu ah Taigü Mâng ah kya lo ciah Arles mânggo ung ka Hilary no Taigü Mâng Honoratus ah ghünlu lah a läklam gui a mong cu a m’thei m’thang pyein hlak ciah kya ci. Bä ciah Honoratus no a m’düi ghüt ah Boiphaya kyawng tuhgüt chüt Taigü goi a k’daa om ciah kya ci.
