A kut khaw k’gùng, m’gái bà ci.
K’Hngüp kä so-pha k’hma hleih Cãpernaum pigò-ah gok lo bà chü-tah Ani cuh im tumat-ung a om tu hmat u nehtah k’chàng a k’dá, m’kõt lo ung luhnák vai hngo kä om-èin khai-ah, a k’pung hngo-ah ng’bum lo ci gùi. Cun kon ah akut khaw k’zùng tumat, k’chàng k’phlì nawh ’kot lo u neh Jesu-ah lo püi ci gùi. K’Chàng bé u hleih a mà-ah, kä lo püi hnging u neh im-k’cih ci pok neh k’hmòng neh akut khaw k’zùng a ng’zännák mah-ah zu k’chak ci gùi. Jesu nawh ngami-ah zùmnák hnguh neh akut khaw k’zùng àm, “Ka htá aw na kat gùi ka ning ’phión zop ci,” ci neh piéin ci. Cu zah ah k’chü m’cäi k’süm a m’sah ngo u neh ami m’lung-àm, “A i-ah kia hleih sin-nah k’chàng nawh cun-ah piéin hnging khai ang? Khãnpùghí ng’ming mät katnák neh k’chü ci. Khãn-pùghí tumat kon-ah a u nawh, kat k’phión hnging khai ang?” ci neh ng’ngah-tüh ci gùi. Ami m’lung-’kiong-ah, cun-ah ami ng’ngah-tüh cuh, a k’tén-ah hmat neh ngami àm a piéin lo cuh, “A i-ah kia hleih cèin-ah nami ’ngaih ang? Akut khaw k’zung-àm a i piéin vai ng’hloi tu bà neh-ang? ‘Nakat ka ning k’phión ci,’ ci ang, Kä cun ung ‘na ihnák ’kõt neh m’khãn neh hteit-ä’ci ang? Cun tu pang-a phih, k’chàng-a htá nawh khaw m’dek ’khãn-ah, kat a k’phión hnging, m’dáng vai-ah phäh-ah, akut khaw k’zung-àm piéin neh “Nang àm ka piéin ci. Na ihnák, ’kõt neh na im-ah hteit bà-ä” ci ci. A cu vai àm, ani cuh, let lo neh a ihnák lah neh k’chàng van-ah mà-ah hteit hleih, om tu ci phung, cäi u neh “Sin-ah hlo, k’hmät htá phih, kä hnguh tu man,” ci neh Khãnpùghí m’tam ci gùi.
